Ракометарите на Прилеп успеаја да одиграат одлична средба на гостувањето во Скопје кај тимот на Бутел и да победат со 21:19 така што останаа во трка за плеј-оф до крај и в недела ќе се одлучува кој ќе биде третиот тим од групата Б.
Прилеп денеска го имаше одлично расположениот Реваз Чантурија, кој го покажа своето искуство на терен и успеа да ги води своите колеги до посакуваните три бода на овој тежок натпревар.
Гостите тргнаа подобро во натпреварот и брзо стигнаа до водство кое гарантираше мирно продолжение. Веќе на средина на првиот дел беше 6:2, а четири од овие погодоци беа дело на Чантурија. Во овој период останаа и без првиот избор за голот Цинцадзе кој доби црвен картон, но тоа не беше поголем проблем за прилепчани.
Овие плус четири се одржуваа без поголеми проблеми до крајот на првото полувреме, но на одмор се замина со предност од 11:8.
За шест минути во второто полувреме трите гола позитива станаа плус шест, па Прилеп имаше 14:8. Меѓутоа како да дојде до застој во овој период односно нападот не функционираше повеќе на нивото кое беше потребно за натпреварот да биде однесен до победа. На сето тоа проблем беше и голманот Блажески кој се разбрани.
Домашните се доближија до гол разлика и во 53. минута имаа 18:19. Високата предност на Прилеп беше стопена, но тука се влезе во период без голови каде што на моменти имаше и бркотница по теренот. Играчите на Бутел Скопје се обидоа и со пресинг, но сето она што беше добро во одбрана не беше и во нападот каде што имаше грешки.
Гол конечно падна на минута и десет секунди до крајот кога Шокоски погоди за плус два, но Стојановски врати набрзина. На крајот најдобриот на теренот донесе победа од 21:19. Чантурија на асистенција од Шокоски го реализираше последниот напад, па овозможи својот тим в недела до крајот да се надева за плеј-оф.
И Прилеп и ГРК Тиквеш победија денеска така што сега се на 16 поени и со шанси да се пласираат во плеј-офот.