СП 2021 Група Д: Бранителот на титулата Данска посакува перфектен старт

Групата Д е составена од репрезентации од четири контитенти, но еден тим е неприкосновен фаворит. Бранителот на титулата Данска ќе се обиде да го одбрани златниот медал после разочарувачкото издание на Европското првенство во 2020 година, додека Аргентина, Бахреин и Конго ќе се борат за другите две места кои водат во следната фаза. Пред две години на домашен терен Данска ја освои својата прва светска титула совладувајќи ја во финалето Норвешка со убедливи 31:22.

Сепак, само една година подоцна без значителни промени во составот Данска не успеа да го мине прелиминарното коло на ЕУРО 2020 што беше големо разочарување. Сигурно е дека притисокот е голем врз Данците, но тие се подготвени и ќе бидат фаворити против сите противници од групата Д. Данска нема да се задоволи со ништо друго освен со три победи во прелиминарната рунда. Бранителот на титулата досега никогаш нема загубено од Аргентина или Бахреин, а дуелот против Конго во второто коло ќе биде нивна прва меѓусебна пресметка.

Данска победи на четири од пет дуели против Аргентина, единствениот дуел кој заврши без победник 24:24 беше на Светското првенство во Катар во 2015 година во групната фаза. Последните два натрпревари беа лесни победи на Данска, на ОИ во Рио 2016 победа од 25:19 и на првенството во Франција во 2017 година, 33:22. Против Бахреин, Данците имаат две победи на два натпревари, тесна победа од 26:24 на квалификацискиот турнир за ОИ во Рио 2016 и победа од 30:26 на првенството во Франција 2017 година.

Со проверени сили и најдобриот играч од претходниот Мундијал, Микел Хансен, Данска има амбиции за најмалку уште еден подиум. Пласманот на второто место во групата Д ќе биде многу важно, па се очекува дуелот помеѓу Аргентина и Бахреин да биде одлучувачки.

Бахреин претрпе смена на селекторската позиција во ноември бидејќи Мајкл Рот беше заменет со исландскиот селектор, Халдор Јохан Сигфусон кој е поранешен предводник на јуниорската репрезентација на Исланд. Сигфусон ќе се обиде да го израмни постигнувањето во меѓусените дуели на Аргентина и Бахреин. Единствениот дуел досега го доби јужноамериканскиот тим на СП во Фрнација во 2017 година со убедлив резултат 36:27.

Аргентина само трипати ја има поминато прелиминарната фаза на светските првенства, во 2001, 2011 и 2015 година. На Мундијалот во Египет ќе имаат добра можност да го повторат овој успех доколку остварат победа барем против Конго. Африканската репрезентација ќе дебитира на светските првенства и ќе се обиде во првиот настап да го освои и првиот бод. Тимот кој обезбеди пласман во Египет со освојување на седмото место на првенството на Африка ќе има тешка задача да се спротивстави на многу поискусните екипи од нив.

Откако добија лекција на ЕУРО 2020, Данците доаѓаат на Мундијалот со амбиции да ја одбранат титулата. Данска секогаш е еден од фаворитите за златен медал, а така е и на ова првенство. Досега Данска има вкупно 23 учества, секако најголем успех и е шампионската титула во 2019 година. Клучни играчи во скандинавскиот состав се    Никлас Ландин (голман), Микел Хансен (лев бек) и Расмус Лауге (среден бек).

Аргентина е втор фаворит во групата со оглед на тоа што има подобар биланс од Бахреин во меѓусебните дуели. Но тоа не мора ништо да значи и ќе треба на терен да обезбедат пласман во следниот круг. За Аргентина ова е 12. учество на Мундијалите, откако настапија првпат во 1997 година континуирано играат на сите првенства досега. Клучни играчи во тимот се Диего Симонет (среден бек) и Федерико Виера (десен бек).

Бахреин се стреми да го подобри најдобриот пласман на едно Светско првенство кој го имаше на претходното во 2019 година. Азиската репрезентација досега има учествувано на три Светски првенства додека во 2015 година иако обезбедија пласман го откажаа учеството. Најголем успех им е 20. позиција на последното СП. Клучни играчи во тимот се Хуесин Ал Сајад (среден бек), Мохамед Хабиб (десен бек) и Мохамед Хусеин (голман).

Конго ќе дебитира на Мундијалот во Египет и ракометарите од оваа земја пристигнуваат на првенството со поразлично мото, а тоа е да помогнат на луѓето повеќе да веруваат во своите сонови. На првиот настап Конго ќе бара изненадувања против поискусните тимови и сигурно нема лесно да се предаваат на натпреварите. Клучни играчи во тимот се Орелиен Шитомби и Одри Тузолана.