Мешков Брест го бара Сташ Скубе!

Словенечкиот интернационалец Сташ Скубе, иако има уште две години договор со актуелниот европски првак Вардар, би можел да си замине на лето од Скопје.

Хановер и ПСЖ беа во трка за потписот на средниот бек без кој не може да се замисли играта на Вардар, а според последните информации бундеслигашот веќе не е опција за Скубе.

Најновиот тим на листата заинтересирани за Скубе е белорускиот Мешков Брест, кој подготви богата понуда и нема да жали пари да стигне до потписот на Словенецот. Според нашите информации Скубе е многу блиску до трансфер и договор на две сезони.

Тренерот Раул Алонсо во Брест на централната бековска позиција во моментов ги има Кулак, Обрановиќ и Малус, а пред заминување се првите двајца, па во Мешков би можело да се спојат двата средни бека од Словенија – Малус и Скубе.

Мешков Брест и лани испрати понуди за неколкумина вардарци, меѓу кои беше и Скубе, а сега повторно се обидува да го донесе во своите редови, иако нејасно е дали ќе овој клуб ќе добие место во Лигата на шампионите следната сезона.