КЛ7 стана Голден Арт КЛ7 и доби место во Суперлигата следната сезона

Ракометната Федерација на Македонија на вчерашниот состанок на УО ја потврди претходно донесената одлука со која во македонската Суперлига ќе се натпреваруваат 16 клубови, наместо досегашните 12.

Место обезбедија и најдобрите шест прволигашки екипи, меѓу кои и КЛ7, клубот што по една сезона во прволигашкото друштво, ќе игра во Суперлигата. Оттаму велат дека целта е остварена.

„Целта на клубот кој од август 2019 стана нов ракометен субјект во Првата лига, беше влез во Супер лигата преку квалитетен тренажен процес и професионален развој на младите играчи. Со овој чекор напред и учество во најсилната домашна лига ќе се засили и досегашната обемна работа, но и мотив за постигнување на повисоки резултати. Со ангажманот на талентираните млади домашни играчи, максимална посветеност и работа покажавме дека може и мора да се даде можност на нашите ракометари. КЛ7 во март се ребрендира и во Суперлигата ќе настапува со ново име Голден Арт КЛ7. Со долгорочни цели поставени на здрави основи, дисциплина и континуирана професионална посветеност Голден Арт КЛ7 продолжува во Суперлигата“, се вели во соопштението од новиот суперлигаш.

Покрај Голден Арт КЛ7, во Суперлигата ќе играат Астраион, Прилеп, Тиквеш, Јуниор Кисела Вода и Младост Богданци.