И во Норвешка се создава дрим-трим: Колстад ги бара Сагосен, Род, Гулеруд….

Ракометниот клуб од Трондхајм кој настапува во првата лига на Норвешка, Колстад планира во наредниот период да создаде врвен тим. Веќе се контактирани неколку играчи кои играат во странство, а се репрезентативци на Норвешка.

Најзвучното име е Сандер Сагосен кој во овој момент настапува за Кил. Исто така уште двајца ракометари кои играат во Бундес лигата се споменуваат како можно засилување за Колстад, а тоа се Магнус Род од Флензбург и Магнус Гулеруд од Магдебург.

Засега овие играчи само се контакирани од клубот без договор, но дека Колстад бара квалитетни играчи е повеќе од само гласини во медиумите. Како можна опција за тренерското место се појавува Кристијан Берге, селекторот на Норвешка но засега тој има договор со репрезентацијата до 2025 година, а да работи и во клуб и во репрезетантација не е опција.

„Знам дека има многу гласини за нас и не можам да кажам многу за тоа. Но, нашиот сон е да го вратиме дома Сандер Сагосен. Имаме соништа, визии и амбиции, целта е да станеме најдобриот машки клуб во Норвешка до 2024 година. Тоа е она на кое што работиме и соодветно ќе преземеме активности за да го оствариме тоа“, коментираше генералниот менаџер на Колстад, Јостеин Сиверстен за норвешки ТВ2.

Дел од тренерскиот тим на Колстад е Ерленд Сагосен кој е татко на Сандер Сагосен и како што вели, не дошол во клубот да го донесе и неговиот син туку да се обиде да создаден нов Сандер. За сезонава Колстад има високи поставени цели, но на почетокот на сезоната бележи слаби резултати и започна со три порази. И покрај тоа нивните амбиции не се намалуваат.