Женската ракометна репрезентација на Македонија додека траеше Европското првенство во Данска требаше да ги игра квалификациите за бараж за Светско првенство во Шпанија.
Сепак тие беа презакажани и ќе се играат од 17 до 19 март 2021 година во Скопје. Доколку Македонија освои едно од првите две места, во што нема сомнеж, во конкуренција на Грција, Литванија и Исланд, ќе обезбеди место во баражот.
Веќе се познати десетте селекции кои од првиот шешир ќе ги очекуваат ривалите од квалификациите, меѓу кои би требало да биде и Македонија. Можни ривали на избраничките на Симе Симовски ќе бидат Русија, Германија, Црна Гора, Унгарија, Шведска, Романија, Србија, Полска, Чешка и Словенија.
Сите овие селекции се пласирани од 5 до 16 место на Европското првенство во Данска што се уште се одржува во скандинавската земја.
Термините за бараж натпреварите се од 16/18 април и 20/22 април 2021, додека Светското првенство во Шпанија ќе се игра од 2 до 19 декемри. Домаќинот и светскиот првак Холандија веќе имаат обезбедено место, а ова ќе биде прв женски Мундијал со 32 селекции, од кои дури 16 ќе бидат од европскиот континент.