Kaко што најави 24Ракомет, македонската репрезентативка Марија Гугуљанова од наредната сезона ќе го има првиот предизвик во странство.

Десното крило што беше дел од Ол Стар тимот на 24Ракомет во Супер женската лига и што освои двојна круна минатата сезона со тимот на Ѓорче Петров од летово ќе игра за полскиот тим Пјотрковија, а клубот денеска го официјализираше трансферот.

Станува збор за тимот што беше третопласиран во полскиот шампионат минатата сезона зад Заглебје Лубин и Лублин, и покрај на домашна сцена ќе игра и во Лигата на Европа.

Гугуљанова потекнува од Валандово, а во кариерата во Македонија играше за Металург, Металург Автокоманда и Ѓорче Петров, а настапите во Полска ќе и бидат први надвор од нашата држава.

Во составот на Пјотрковија своевремено играше уште една Македонка, Зорица Десподовска.

____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________

Поранешната македонска репрезентативка Елена Ѓорѓиевска, многу веројатно во идната сезона ќе има нов предизвик во богатата кариера, дознава 24Ракомет.

Десниот бек што му беше асистент на Кристијан Грчевски во женската сениорска репрезентација, се наоѓа пред трансфер во српскиот шампион Црвена Звезда, каде што веќе потпиша уште една македонска репрезентативка Јована Мицевска.

Минатата сезона Ѓорѓиевска беше главните стрелци во турскиот тим Одунпазари, а претходно играше за Анталија Коњалти во оваа држава, како и за полската екипа Калиш.

Ѓорѓиевска потекнува од Струга, играше за Еуростандард Ѓорче Петров, Кометал Ѓорче Петров, па за Металург, пред да замине во Будуќност, каде освои и титула во Лигата на шампионите.

Една од најдобрите македонски ракометарки во поновата историја ги носеше дресовите и на романските Магура Чиснадие, Баја Маре и Крајова, а беше дел и од унгарската Алба Фехервар и хрватската Подравка.

Црвена Звезда без поголема мака минатата сезона ја освои двојната круна во Србија, во новата сезона има големи амбиции на меѓународна сцена и одново ќе се проба во Лигата на Европа, а ќе игра и во регионалната лига.

Досега осум нови ракометарки ќе го носат „црвено-белиот“ дрес – покрај Мицевска, дојдоа уште Дуња Табак од Локомотива Загреб, Германката Најна Клајн од Мецинген, голманката Моли Кубина, средните бекови Уна Обреновиќ и Невена Радиќ, како и десното крило Наташа Ловриќ, но и пивотменот Катарина Бојичиќ.

Амбициозниот проект на Лос Анџелес продолжува да привлекува звучни имиња од европскиот ракомет. Нов член на американскиот клуб е 36-годишниот дански ас Микаел Дамгард, олимписки шампион и светски првак со Данска.

Левиот бек пристигнува од данскиот ХОЈ, клуб кој минатата сезона испадна од елитното првенство, а во својата богата кариера остави длабока трага и во дресот на Магдебург, со кој ги освои Бундес лигата и Лигата на шампионите.

Со репрезентацијата на Данска, Дамгард беше дел од генерацијата што го освои олимпиското злато на Олимписките игри во Рио 2016, како и светската титула во 2023 година.

Неговиот ангажман е уште еден доказ за сериозните амбиции на Лос Анџелес, кој во пресрет на Олимписките игри во 2028 година продолжува да составува тим исполнет со големи европски ѕвезди. Дамгард ќе биде едно од најискусните и најпрепознатливите имиња во новиот американски проект, чија цел е дополнително да го популаризира ракометот во САД.

Претходно за Лос Анџелес потпишаа имиња како Вилијам Акамбре, Мортен Олсен, Мими Краус…

Селекциите на Германија, Швајцарија, Шпанија, Данска, Шведска и Унгарија се шесте селекции после Македонија што обезбедија пласман на Светското првенство за младинци во Скопје наредната година.

Овие шест репрезентации ги запишаа вторите победи на ЕП во Романија, со тоа обезбедија место во главната рунда, односно ТОП 12 што ќе биде доволно за пласман на Мундијалот наредната година.

Во групата А, Португалија и Франција ќе се борат за второто место, додека Грција нема шанси за ТОП 12. Во групата Б, Србите загубија убедливо од Швајцарија и си ја закомплицираа работата околу пласманот во главната рунда, па во последното коло ќе мора да ја победат Турција и да се надеваат дека Фарски Острови нема да ја победи Швајцарија.

Во групата Ц, во третото коло Исланд со триумф над Летонија ќе оди понатаму, додека во групата Е, Шведска е прва сигурно, а другите три селекции имаат шанси. Босанците по вчерашниот триумф над домаќините, денеска се распаднаа против Израел и сега сите картии се отворени околу вториот патник во ТОП 12.

Во групата на Македонија, Данска е сигурна во главната рунда, а за второто место ќе се борат Норвешка и Хрватска, додека во групата Ф, Унгарците се сигурни за понатаму, а Словенија ќе мора да слави во последното коло за да оди во ТОП 12.

Европско првенство, 2 коло, резултати:

група А
Германија – Португалија 24-21
Франција – Грција 31-27

група Б
Фарски Острови – Турција 40-28
Србија – Швајцарија 25-35

група Ц
Исланд – Шпанија 28-33
Австрија – Летонија 38-28

група Д
Данска – Норвешка 33-30
Хрватска – Македонија 34-29

група Е
Израел – Босна и Херцеговина 43-33
Шведска – Романија 44-26

група Ф
Чешка – Полска 22-30
Унгарија – Словенија 28-26

Тимот на Овче Поле СУ го продолжи договорот со уште една ракометарка за претстојната сезона во која ќе влезе со големи амбиции во Првата женска лига.

Станува збор за голманката Стефани Ѓоргиева, која минатата сезона го бранеше голот на кадетската екипа на Овче Поле СУ, а сега ќе биде дел од голманското трио на сениорската екипа заедно со Дона Маркоска и Ивана Станчева.

Минатата сезона за влакно клубот од Свети Николе не успеа да се пласира во баражот за Супер лигата.

Претходно Јована Ангеловска, Ивана Станчева, Јована Конева и Викторија Димчева останаа верни на тимот од Свети Николе и потпишаа нови договори за наредната сезона.

Покрај овој квартет која останува во клубот, Овче Поле СУ донесе уште две млади ракометарки – Натали Маџовска (2008), која игра на позиција лев бек, а доаѓа од кадетската екипа на Вардар, како и Андонела Ангелковиќ (2013), која игра на позиција десно крило и доаѓа од пионерската екипа на Спартак.

Кружниот напаѓач Михаела Николовска од Куманово исто така се пресели во редовите на клубот од Свети Николе, а се врати и левото крило Стефанија Павловска. Нови договори потпишаа голманката Дона Маркоска и левиот бек Јана Ристовска.

____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________