Ракометарките на Ѓорче Петров во рамки од 22. коло од Женската лига очекувано забележаа победа над Овче Поле СУ со 35:17.
За шампионот денешниот триумф беше 21-ви во тековната сезона и со новите три бодови дојде до 64 на свое конто.
Овче Поле СУ на 22 одиграни натпревари успеа да оствари седум победи, доволно да ги избегне последните две места на табелата.
Избраничките на Симе Симовски на гостувањето во Свети Николе немаа проблеми да стигнат до убедливата победа, која беше најавена уште во првите 30 минути.
Домашниот тим беше рамноправен само во воведниот дел, потоа „лавиците“ започнаа постепено да се одлепуваат.
Ѓорчепетровки на пауза имаа предност 14:10 и рутински го одиграа вториот дел, во кој домашниот тим постигна само седум гола.
Емилијана Ризоска ги предводеше стрелците во победничката екипа, постигна десет погодоци, додека во поразениот табор се истакнаа Елена Вучевска и Јована Конева со по пет погодоци.
ПОВРЗАНИ ВЕСТИ
