Машката репрезентација на Македонија со голот на Филип Кузмановски одигра реми против Австрија, 29:29, во натпревар од 1. коло од главната фаза на Светското првенство 2025 во Данска, Норвешка и Хрватска.
Македонија го отвори натпреварот во „Вараждин Арена“, а во 5-та минута со голот на Петар Атанасијевиќ нашата репрезентација поведе со 3:1. Избраниците на Пајовиќ имаа неколку шанси да дојдат до изедначување, но „црвено-жолтите“ успеаја да излезат од малата криза, беа без гол од 8-та до 14-та минута.
Нашата репрезентација по првата половина од првиот дел имаше предност од 6:4, а во 16-та минута Лазаревски донесе плус три, 7:4. Австрија со три брзи гола, два на Фримел и еден на Белош, израмни на 7:7.
По камбекот на австриската репрезентација, следуваа два гола на Македонија за 9:7 во 20-та минута. Митев беше расположен во нашите редови, асистираше и погодуваше, па така нашата репрезентација успеа да зголеми на 10:7.
Иако Македонија водеше со 11:9, ракометарите на Австрија со серија од 3:0 ја презедоа предноста. Во последните две минути се играше гол за гол, а избраниците на Пајовиќ на пауза заминаа со минимална предност од 14:13.
Австрија на стартот на вториот дел дојде до дотогаш највисоките плус два, 15:13, а Македонија првиот гол во вторите 30 минути го постигна преку капитенот Кузмановски, кој намали на 15:14. По предноста на Австрија од 17:15, следуваше серија од 3:0 на нашата репрезентација, која во 40-та минута поведе со 18:17.
Двете репрезентации наизменично се менуваа во водство, се играше гол за гол и само нијанси решаваа каков ќе биде исходот од големата борба. Македонија во последните пет минути влезе со предност од 26:25, а Австрија бргу израмни на 26:26. Следуваше драматичен финиш, избраниците на Пајовиќ на минута пред крајот дојдоа до 28:27, потоа Митев постигна погодок за 28:28, останаа уште триесетина секунди, реализираа Австријците за 29:28, додека во самиот финиш Кузмановски погоди за 29:29.
