Мартин Ивановски по четири сезони повторно е во родниот град и во дресот на Охрид. Средниот бек беше дел од убедливиот старт на „гладијаторите“ на турнирот во Струга, а неговата порака е јасна – најважни се победите и успехот на екипата. Охрид победи со 37-24.
Охрид со убедлива победа го започна настапот на 54. издание на турнирот во Струга, а првиот меч имаше дополнително значење за Мартин Ивановски. По четири сезони минати надвор од родниот град, во Битола и Скопје, средниот бек летово повторно се врати дома и го облече дресот на матичниот клуб.
За Ивановски личниот учинок нема да биде во преден план. Неговата главна цел е да му помогне на Охрид да продолжи да победува и да ги оствари високите амбиции што клубот ги има во новата сезона.
„Сакам да го дадам максимумот за екипата. Најважно ми е Охрид да игра добро и да победува. Мојот личен перформанс е во втор план. Нормално дека сакам да одиграм добро, но тоа треба да биде во функција на екипата. Најбитно е тимот да победува“, вели Ивановски.
Одличен почеток, но без опуштање
Охрид во Струга пристигна како бранител на трофејот и како актуелен освојувач на ЕХФ Европскиот куп, а уште на стартот покажа дека и годинава има сериозни амбиции.
Сепак, во таборот на „гладијаторите“ нема еуфорија по првата победа. Следен противник е Дубочица од Лесковац, а со нов триумф Охрид би го потврдил првото место во групата и би обезбедил ново финале во Струга.
„Нема никакво потценување на Дубочица. Ние го почитуваме секој противник и максимално ќе се подготвиме за следниот натпревар. Сега треба добро да се одмориме, а потоа со максимални сили да влеземе во мечот“, истакна Ивановски.
Целта е јасна – уште една победа и нова борба за пехарот.
„Се надеваме дека ќе извојуваме уште една победа и повторно ќе играме во финалето“, порача средниот бек на Охрид.
Нова улога во добро позната средина
За Ивановски враќањето во Охрид значи и нов почеток во добро позната средина. По неколку сезони во други клубови, сега ќе биде дел од тим кој зад себе има историска сезона и во кој очекувањата се значително поголеми.
View this post on Instagram
Охрид не го крие стремежот да остане во врвот на македонскиот ракомет, но и повторно да биде конкурентен на европската сцена.
За Ивановски, сепак, рецептот е едноставен – тимот да биде пред поединецот.
„Сакам да помогнам колку што можам. Ако екипата игра добро и победува, тогаш и мојата работа ќе има вредност“, е пораката на Ивановски.
Првата задача е Дубочица. Ако Охрид ја продолжи победничката серија, бранителот на трофејот повторно ќе се најде во мечот кој решава за пехарот во Струга.
_________________________________________________________________________________________
▶▶▶ Добивај директно РАКОМЕТНИ ВЕСТИ вести на твојот мобилен телефон, приклучи се на Viber групата на семејството на 24ракомет. Со еден клик до сите вести.
_____________________________________________________________________________________________________
