Хаиме Гаљего, поранешен играч на Барселона и Торелавега, објави дека ја завршува својата професионална кариера на само 23 години поради сериозна бактериска инфекција на левиот глужд.
Кариерата на Гаљего драматично се промени во 2023 година, кога за време на Купот на Шпанија неговиот глужд без очигледна причина му отече. Тоа беше само неколку месеци по неговото пристигнување во Барселона, каде беше доведен како една од најголемите надежи на позицијата пивот.
Иако со каталонскиот клуб успеа да го освои Иберискиот Супер Куп и Купот на Шпанија, по тој натпревар на 17 декември 2023 година никогаш повеќе не се врати на теренот.
По долг период без настапи, во август 2024 му беше дијагностициран артритис на глуждот, а по бројни третмани и операција за чистење на зглобот, проблемите продолжија. Дури по дополнителни анализи лекарите откриле дека станува збор за стрептококна бактерија која ја зафатила целата артикулација, по што Гаљего морал повторно да оди на операција и да се подложи на долг антибиотски третман.
„По сè што се случи, глуждот остана многу оштетен и ми го отежнуваше секојдневниот живот. Сакам барем да можам да одам без болка и да поминувам време надвор од дома,“ напиша Гаљего во своето соопштение.
Иако неговата професионална кариера завршува прерано, младиот ракометар сè уште се надева дека еден ден ќе може повторно да заигра на теренот и да добие „втора шанса“ од спортот што го сака.
