Селекторот на женската репрезентација на Романија, Флорентин Пера, го објави списокот на ракометарки за Европското првенство во Унгарија, Швајцарија и Австрија.

Тој ќе смета на 18 ракометарки, кои ќе бидат дел од натпреварите во „Златната лига“ во Данска, а потоа и на континенталниот собир.

На списокот ја нема Кристина Ласло, која Пера ја тренираше во неговиот клуб Глорија Бистрица, по нивниот меѓусебен конфликт, а нема да игра ниту Елиза Бучески, која се откажа од националниот тим, откако Пера не ја повика на последните два собири.

Романките се во групата Б што ќе се игра во Дебрецин, заедно со Црна Гора, Србија и Чешка, па ќе има добри шанси да се избори за главната рунда.

Екипата на Раховец, кој е предводена од македонскиот стратег Горан Андоновски, а во која настапува кружниот напаѓач Стефан Атанасовски, ја продолжи победничката серија во домашниот шампионат.

Раховец во заостанатиот натпревар од 6. коло од најквалитетното натпреварување на Косово славеше убедливо против Вјоса на Илиja Трпевски и Обрен Фичуроски со 17 гола разлика, 38:21.

Со новите два бода, тимот предводен од Андоновски го зголеми бодовното салдо, сега има 14 бода, додека главните конкуренти на Раховец, Беса и Кастриоти, два пода помалку – 12.

За Раховец ваквите полесни натпревари со домашни екипи се проверка на силите пред големиот предизвик во Европскиот Куп.

На 23 ноември, Раховец во рамки од 3. коло од третото по ранг европско клупско натпреварување ќе биде домаќин на романската Баја Маре, а реванш дуелот ќе биде на 30 ноември во Романија.

Новиот стратег на Вардар, Гиљермо Милано, пристигна во Скопје и ќе го преземе кормилото на „црвено-црните“.

Тој имаше обврски со младинската и кадетската репрезентација на Аргентина на шампионатите на Средна и Јужна Америка пред да дојде во македонската престолнина.

Милано се „чекираше“ на социјалните мрежи од Скопје и своето деби би требало да го има веќе на дуелот со Струга од Супер лигата што ќе се игра в сабота.

Аргентинскиот стратег со младинците го освои златото на шампионатот во Средна и Јужна Америка, додека со кадетите играше во финалето и освои сребро.

По мечот со Струга од Супер лигата, за Вардар следува патување до далечниот Исланд и меч со Валур од Лигата на Европа.

По двете пријателски средби со Австрија, како и настапот на „Трофеј Карпати“ во Романија, женската репрезентација на Македонија ќе има уште две проверки пред настапот на Европското првенство во Австрија, Швајцарија и Унгарија.

Дамите ќе бидат дел од силниот „Кроација Куп“, што ќе се одржи во Хрватска од 22 до 24 ноември во градот Пореч.

Покрај Македонија и домаќинот Хрватска, на овој турнир ќе настапи и селекцијата на Србија, па ќе имаме балкански проверки пред континенталниот собир.

Домаќинот ги одреди термините за трите средби. На 22 ноември од 16:00 ќе играат Хрватска и Македонија, на 23 ноември во истото време на програмата е мечот на Македонија и Србија, додека Хрватките и Србинките ќе играат на 24 ноември во 16:00 часот.

Македонија е во група со Унгарија, Шведска и Турција, а првиот натпревар на ЕП, избраничките на Кристијан Грчевски го играат против Шведска на 28 ноември.

По четири години минати како тренер на голманите во младите категории во репрезентацијата на Катар, Петар Мисовски поранешниот репрезентативен голман на Македонија ќе остане во Доха, но ќе има нов предизвик – ќе биде дел од стручниот штаб на Духаил, еден од најдобрите екипи во таа земја.

Актуелниот освојувач на Купот на Емирот во Катар и тим кој последните девет години постојано освојува трофеи во Катар, го побара Мисовски да биде дел од нивниот стручен штаб и да биде задолжен за формата на голманите во сениорката екипа.

Поранешниот репрезентативец на Македонија кој зад себе има и интернационална кариера пред да замине во Катар во 2021 година, работеше во Металург исто така тренер на голманите, и заедно со Лино Червар кога Металург играше во ЛШ и СЕХА лигата. Работата и резултатите му донесоа бројни препораки, па така и најдобриот катарски тим му понуди да биде дел од нивниот стручен штаб.

Духаил е речиси „тим-репрезентација“ и во него има 12 репрезентативци на Катар кои во јануари ќе играат на СП во Пореч, Хрватска. Во тимот главни ѕвезди се Капоте, Мададаи и Токуда, а Духаил го брани освоениот Куп на Емирот, најценетиот трофеј во Катар. Тренер на екипата е Горан Ѓокиќ.

Тимот ќе настапи на Азиското клупско првенство кое следниве десетина дена ќе се игра во Доха, како претставник на Катар, заедно со тимот на Ал Рајан. На 17. азиско клупско првенство ќе играат вкупно 10 екипи, од Катар, Ирак, Кувајт, ОАЕ, Саудиска Арабја, Оман, Бахреин и Иран.

Мисовски во својата играчка кариера има настапувано за екипите на Пелистер, Пролет, Вардар, Металург, а има играно и во Данска, Шведска, Норвешка, Хрватска, Турција и Словенија. Како играч има освоено 5 првенства и Куп трофеи во Македонија, и плус 1 Куп со Металург како тренер во 2019 година, победувајќи го Вардар во финалето.