Шампионот го „преспа“ првиот дел, па во вториот ја торпедира Деспина

Шампионот Ѓорче Петров забележа нова победа во Женската лига, откако славеше на гостувањето кај Деспина во Прилеп со убедливи 32-17.

Во првиот дел прилепчанки диктираа темпо, имаа контрола на резултатот, а во еден момент водеа и со пет гола разлика, 8-3, а голманката Чурлиновска бранеше одлично.

По тајм-аутот на Симовски, „лавиците“ заиграа поангажирано, полека почнаа да ја топат негативата и до паузата поведоа за првпат, 12-11.

Вториот дел го одиграа практично без грешка, одбраната беше на ниво, и прими само шест погодоци, а домаќинките немаа сили да парираат на разиграниот шампион.

Најдобри стрелци во победничкиот состав беа Дежиќ, Муратовиќ и Кадиату со по шест гола, додека кај Деспина се истакнаа Цветкоска и Гичева со по пет погодоци.