Ракометарот на Вардар, кој беше дел од двете титули во Лигата на шампионите, Иван Чупиќ во интервју за сајтот на Европската ракометна федерација зборува за својот живот и целата своја кариера, а меѓудругото и за својот претстој во Вардар и за успесите кои тимот ги постигна.
Тој дојде во Вардар од Келце со освоена титула во Лигата на шампионите од 2016 година и веќе следната година одново се искачи на тронот. Тоа беше првата титула за „црвено-црните“ и успех за кој уште се зборува.
„Кога дојдовме до првата титула во 2017 година, која за мене беше втора, во Вардар имаше визионер на водечкото место, а тоа беше Сергеј Самсоненко. Тој беше човекот што инвестираше во тимот неколку години. Таа година имавме мешавина од младост и искуство, имавме некои врвни Шпанци и одличен тренер во Раул Гонзалес. Во тие момент сè се вклопи одлично. Целиот тим кликна како што треба, а ние цело време се дружевме. Тоа заедништво, самата врска меѓу играчите беше одлучувачка и успеавме да го победиме индивидуалниот квалитет на другите клубови“, вели Чупиќ.
Во 2019 година трофејот беше освоен по вторпат. Тогаш Вардар беше предводен од страна на Роберто Парондо, а имаа импресивни натпревари.
„Мојата трета победа во Лигата на шампионите дојде во 2019 година и тоа беше неверојатно. Многу играчи, како и тренерот Раул си заминаа таа година. Медиумите зборуваа дека тоа е крајот на Вардар. Останавме само неколкумина од оние кои ја освоивме првата титула, но и понатаму ја имавме врската. За нас не беше важно што не земавме плата навреме и што бевме уморни. Сакавме да се обидеме и да веруваме дека можеме повторно да ја освоиме титулата. Успеавме да ја надминеме секоја пречка и докажавме дека навистина чуда се случуваат“, коментира Чупиќ.
Репрезентативецот на Хрватска ги игра последните месеци во Вардар бидејќи од јуни се сели во екипата на ППД Загреб. Сепак, она што е сигурно е дека ќе остане миленик на навивачите на Вардар и откако ќе замине.