Струга издржа 20 минути, бодовите останаа во Прилеп

Ракометарите на Прилеп во рамките од 7. коло од Супер лигата ја забележаа третата победа откако на свој терен беа подобри од Струга со 25:22.

Првите 20. минути од натпреварот поминаа во изедначена борба, со цврста одбрана, но и неколку промашени удари на двете страни. Рустамов, Шокоски и Тренчевски беа стрелците на прилепската екипа за нивно водство од 3:2.

Екипата на Наум Танески преку новиот член во струшката екипа, Барјактаревиќ, дојде до првото водство од 5:4. Ракометарите на Струга со долги напади доаѓаа до сигурна реализација, а веќе во 15. минута имаа два гола предност, 7:5. Искусното десно крило на Прилеп, Чантурија за момент го намали водството на гостите на 6:7. Следуваа две последнователни грешки на домаќините и гостите, но тоа не се одрази на самиот резултат бидејќи Струга имаше само еден гол предност, 8:7.

На десет минути пред крајот на првиот дел, Шокоски со својот втор гол го изедначи резултатот на 8:8. Серијата на домаќините продолжи во следните минути, па така, Андоновски ја врати својата екипа повторно во мала предност, 9:8. Избраниците на Горан Кузманоски целосно го скршија отпорот на противникот, направија серија од 4:0 и стигнаа до 14:9 на полувреме.

Прилепчани во второто полувреме зголемија на плус седум разлика, 17:10. Тоа беше јасен патоказ дека победникот на овој дуел ќе биде домашната екипа. Стружани со головите на Кастратовиќ и Јанковски намалија на 12:18, но не можеа ништо повеќе против подобрата екипа на Прилеп.

Во периодот од 40. минута, па до самиот крај, Прилеп рутински имаше контрола на самиот резултат, не дозволи изненадување и продолжи да се надева на подобар пласман во најквалитетната машка лига во Македонија. Конечниот епилог од денешната средба беше плус три разлика за екипата на Прилеп и конечни 25:22 за нови три бода.

СУПЕР МАШКА ЛИГА – ТАБЕЛА