Репрезентативката на Македонија, која во минатата сезона ги бранеше боите на Куманово, Леонида Гичевска ќе ја продолжи својата кариера надвор од Македонија, а нејзиниот нов клуб е од Франција.
Гичевска ја продолжува кариерата во редовите на Ардеш Ле Пужен, клуб каде што ќе има колешка во повремената репрезентативка, Габриела Величковска.
За Гичевска ова ќе биде прво интернационално искуство. Таа е од Свети Николе, а во својата кариера го носеше дресот на Вардар, Металург и Куманово, па сега ќе се обиде да се докаже и надвор од границите.
Се работи за ракометарка која има 22 години, а има можност за напредување. Воедно ова ќе и користи многу и за настапите во репрезентацијата каде што сè повеќе го зазема своето место.
Клубот Ардеш Ле Пужен веќе ја претстави како трета интернационалка така што останува добро да се подготви и да се докаже во првенството на Франција. Инаку, се работи за тим кој се натпреварува во Втората лига на оваа земја.
