Тимот на Охрид славеше против составот на Скопје со убедливи 34-24 и победнички ја заврши 2023 година. Гостите парираа во дел од првото полувреме, но немаа сили во таков ритам за цел меч и на крајот охриѓани ги освоија трите бода без проблеми.
Охрид сега има 33 бода на делба на второто место и подобар меѓусебен дуел од Тиквеш, но кавадарчани имаат и натпревар помалку со вицепрвакот на домашен терен, на кој ако освојат најмалку бод ќе бидат втори. Охриѓани ќе чекаат кикс на кавадарчани за да пренесат два бода во плеј-оф.
Скопје на натпреварот парираше во првите дваесетина минути, а најчесто се играше гол за гол до 11-11 и имаше дури девет израмнувањ на резултато. Тогаш гостите почнаа да грешат, а сите нивни грешки беа казнети.
Погодија Крстевски, Шипинкоски, Тасески, како и голманот Ристевски за 16-11, но Скопје постигна гол до паузата за 16-12. Второто полувреме беше само формално одработување на веќе започнатата работа и немаше возбудувања на теренот.
Двајцата стратези им дадоа шанса на повеќето ракометари од клупите, а резултатската предност во корист на охриѓани растеше до конечните плус десет за победнички крај на годината.
Најдобри стрелци кај Охрид беа Теимураз Орјоникидзе и Никола Шипинкоски со по шест погодоци, додека Никола Стоилевски даде пет. Во составот на Скопје се истакна Бојан Чакалиќ, кој седум пати ја затресе домашната мрежа.
ПОВРЗАНИ ВЕСТИ
