Вардар Неготино го совлада Текстилец со 36-25 (17-11) на гостувањето во Штип, во петтото коло од Првата машка лига. Неготинци му го нанесоа првиот сезонски пораз на ривалот, кој во мечот влезе со четири победи од четири натпревари. Со овој триумф неготинци се вклучија во врвот на табелата на Прва Лига.
Вардар ги постигна првите четири гола и уште во петтата минута поведе со 4-0. Текстилец брзо се врати на 3-4, но не успеа да израмни. Гостите повторно ја зголемија предноста на 8-5, пред домаќините да го направат својот најсериозен обид за пресврт.
Штипјани во 17. минута намалија на 7-8, а во 21. минута стигнаа и до 9-10. Тоа беше последен пат да бидат на гол негатива. Вардар одговори со три погодоци во низа за 13-9, а од 14-11 го доби и финишот на полувремето за предност од 17-11 на паузата. Текстилец во првите 30 минути промаши три седмерци.
Домаќините на почетокот на вториот дел намалија на 14-18, но Вардар повторно возврати со серија од 3-0 и поведе со 21-14. Кога Текстилец стигна до 17-23, следуваа уште три гола на гостите за 26-17 во 45. минута. Неготинци потоа ја однесоа разликата и на 31-20, а последниот гол на Велимир Грујовски ги постави конечните 36-25.
Костадин Петров беше најефикасен кај победникот со осум гола, Мартин Димов постигна седум, Ѓорѓи Орешков шест, а Драган Кузманов пет. За Текстилец, Кирил Миленков даде осум гола, а Филип Џинес пет.
Со победата Вардар Неготино стигна до седум бода и привремено скокна од седмото на третото место. Текстилец остана со осум бода и засега е втор, пред преостанатите натпревари од колото. Следен ривал на Вардар Неготино е Партизан 2016 Спорт, додека Текстилец ќе му гостува на Радовиш.
▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾
