Македонскиот првак Вардар го очекува најважниот натпревар во Лигата на шампионите – на гости во Скопје доаѓа Висла Плоцк.

Полскиот вицепрвак досега запиша драматичен пораз кај Нант, но и драматична победа над Мелсунген, а десниот бек Мелвин Ричардсон знае што го очекува него и соиграчите во СЦ „Јане Сандански“.

„Ова ќе биде многу тежок натпревар. Сите знаат дека е навистина тешко да се победи таму, особено поради неверојатната атмосфера. Во последните две години Вардар многу напредуваше. Ова ќе биде важен натпревар и за нив и за нас, особено кога станува збор за продолжението на ова натпреварување. Но, ние сме многу мотивирани да победиме. Сите сме здрави и подготвени, па верувам дека нè очекува одличен натпревар“, изјави Ричардсон.

Натпреварот меѓу Вардар и Висла Плоцк се игра в четврток од 20:45 часот во СЦ „Јане Сандански“.

Вториот викенд од пионерската лига донесе неколку впечатливи поединечни настапи. Филип Коцев постигна дури 16 од 22 гола на Пролет, но неговиот тим загуби од Тиквеш со 30-22. Кај победникот, Никола Биков возврати со 14 погодоци.

Во групата А, Еурофарм Пелистер 2, Струга и Македонија Ѓорче Петров ја запишаа втората победа. Во групата Б, со по два триумфа се Младост 1977 и Гемиџии. Вардар го освои Радовиш, додека „витамините“ стигнаа до првата сезонска победа.

ГРУПА А

Биков и Коцев постигнаа 30 гола, бодовите заминаа за Кавадарци

Пролет и Тиквеш одиграа израмнето прво полувреме. Во 15. минута скопјани водеа со 12-10, но гостите го свртеа резултатот и на паузата заминаа со минимални 14-13. Тиквеш подобро го отвори вториот дел и се одлепи на 21-16. Предноста продолжи да расте, па кавадарчани на крајот славеа со 30-22.

Филип Коцев постигна 16 гола за Пролет – повеќе од сите негови соиграчи заедно. За победничкиот тим, Никола Биков даде 14, а Никола Јанчев и Антониј Паризов по пет погодоци.

Струга го совлада Бутел и остана без пораз

Струга имаше предност од 13-7 на полувремето против Бутел. Во продолжението го задржа темпото, по 30 минути водеше со 20-10 и стигна до победа од 29-14.

Борјан Домазетоски повторно беше прв стрелец на Струга со 11 гола. Тино Бебекоски и Никола Коцарески постигнаа по пет, додека кај Бутел Стефан Котевски и Горазд Алексовски дадоа по четири погодоци.

Еурофарм Пелистер 2 го запре Охрид, Сиљаноски постигна десет од 13 гола

Еурофарм Пелистер 2 и Охрид беа израмнети на почетокот, но битолчани постепено ја презедоа контролата. На полувремето водеа со 12-6, а во вториот дел ја зголемија предноста до конечни 29-13.

Новак Вељановски постигна седум гола за победничкиот состав, а Марко Гламновски и Марко Спировски по пет. Кај Охрид, Горазд Сиљаноски беше стрелец на десет од вкупно 13 гола на својот тим.

„Лавовите“ отворија со 5-0 и сигурно стигнаа до втора победа

Македонија Ѓорче Петров ги постигна првите пет гола против Еурофарм Пелистер. Домаќините во 15. минута водеа со 13-4, а на паузата имаа предност од 17-7. И во продолжението ја задржаа контролата и победија со 31-18.

Димитар Трајковски и Владимир Иванов постигнаа по седум гола за Македонија Ѓорче Петров, а Мартин Томаноски пет. Иво Михаиловски беше најефикасен кај Еурофарм Пелистер со седум погодоци.

ГРУПА Б

Гемиџии со силен почеток против Илинден Вардар

Гемиџии ги постигнаа првите пет гола на натпреварот против Илинден Вардар. Тимот од Велес брзо се одлепи, поведе со 13-4, а по дваесетина минути имаше предност од 19-6. Гостите го подобрија нападот во преостанатиот дел, но Гемиџии ја задржаа разликата и славеа со 34-20.

Андреј Јакимовски и Даријан Бобевски постигнаа по седум гола за победникот. За  Илинден Вардар, Лука Маџовски даде осум, а Андреј Блажевски четири погодоци.

Вардар го освои Радовиш

Вардар беше во водство во текот на гостувањето кај Радовиш. На полувремето имаше 10-7, а домаќините во продолжението се доближија на 13-10. Потоа Вардар постигна четири гола без одговор, поведе со 17-10 и го реши натпреварот. Конечниот резултат беше 21-15.

Михаил Јовчески и Војдан Ѓорѓиевски постигнаа по шест гола за Вардар. Кај Радовиш, Јован Ѓоргиев даде пет, а Никола Вергов и Златко Пранговски по четири.

Втора победа во Автокоманда

Тимот од Автокоманда убедливо го совлада дебтантот, Либра Хандбал со 42-3. Тимот од Автокоманда не прими гол во првото полувреме и на паузата водеше со 27-0. Либра првиот погодок го постигна на почетокот од вториот дел.

Павел Стефановски беше прв стрелец на Алкалоид со шест гола, а Марко Димитриевски, Димитар Арсиќ и Даријан Јаневски постигнаа по пет. За Либра погодија Никола Узунов, Стојанче Пеов и Васил Тенекеџиев.

Митев со 12 гола го предводеше Младост

Младост 1977 го совлада МРК Куманово со 24-11. По израмнетиот почеток, домаќините се одлепија на 10-3, а на паузата водеа со 12-6. Во вториот дел ја зголемија разликата и ја запишаа втората сезонска победа.

Матеј Митев постигна половина од головите на Младост – 12. Антонио Каракабаков додаде седум, додека кај МРК Куманово Петар Попов даде четири погодоци.

Првиот триумф за „витамините“

Вториот тим од Автокоманда ги постигна првите 14 гола на натпреварот против Феникс. На полувремето водеше со 19-1, а до крајот ја зголеми предноста и славеше со 32-4. За тимот од Автокоманда ова е прва победа во сезоната.

Горјан Петрушевски постигна седум гола, Јане Ангеловски шест, а Мартин Стефановски пет за Мулти Есенс. Кај Феникс, Стојан Концалов даде три погодоци.

Машка пионерска лига – 2. коло

Група А
Струга – Бутел 29-14 (13-7)
Еурофарм Пелистер 2 – Охрид 29-13 (12-6)
Македонија Ѓорче Петров – Еурофарм Пелистер 31-18 (17-7)
Пролет – Тиквеш 22-30 (13-14)

Табела по 2. коло: Еурофарм Пелистер 2, Струга и Македонија Ѓорче Петров – по 4 бода; Тиквеш и Охрид – по 2; Прилеп, Пролет , Бутел и Еурофарм Пелистер – без бодови.
Најдобри стрелци вкупно во групата А: Горазд Сиљаноски – 25 гола; Филип Коцев 23; Борјан Домазетоски – 22; Никола Биков и Владимир Иванов – по 16; Димитар Трајковски – 15; Тино Бебекоски и Новак Вељановски – по 10 гола.

Група Б
Гемиџии – Илинден Вардар 34-20
Радовиш – Вардар 15-21 (7-10)
Алкалоид – Либра 42-3 (27-0)
Младост – Куманово 24-11 (12-6)
Мулти Есенс – Феникс 32-4 (19-1)

Табела по 2. коло: Алкалоид, Младост и Гемиџии – по 4 бода; Илинден Вардар, Вардар, Мулти Есенс и Радовиш – по 2; Куманово, Феникс и Либра – без бодови.
Најдобри стрелци вкупно во групата Б: Матеј Митев – 18 гола; Лука Маџовски – 15; Антонио Каракабаков, Марко Димитриевски и Леонид Коцишки – по 13; Петар Попов – 12; Андреј Јакимовски – 11; Калин Краљевски и Војдан Ѓорѓиевски – по 10 гола.

Следно, 3. коло
Група А: Тиквеш – Струга; Еурофарм Пелистер – Пролет ; Охрид – Македонија Ѓорче Петров; Бутел – Прилеп. Еурофарм Пелистер 2 е слободен.
Група Б: Феникс – Гемиџии; Куманово – Мулти Есенс; Либра – Младост; Вардар – Алкалоид; Илинден Вардар – Радовиш.

❗❗  Следете не на нашите социјални мрежи, на Facebook, и на Instagram и бидете дел од Viber заедницата на 24Ракомет – добивајте ги сите информации веднаш на вашиот телефон…

Шпанскиот дефанзивец Ориол Реј Моралес добро ја познава атмосферата во СЦ „Јане Сандански“. Минатата сезона го носеше дресот на Охрид, а сега како ракометар на Висла Плоцк повторно доаѓа во Македонија, овојпат на натпревар од Лигата на шампионите.

Вардар во четврток од 20:45 часот ќе ја пречека Висла во третото коло од елитното европско натпреварување. За поголемиот дел од полскиот состав гостувањето во Скопје ќе биде ново искуство, но Реј Моралес веќе знае каква атмосфера ги очекува гостинските ракометари.

Шпанецот нагласи дека бучавата во салата и поддршката што навивачите му ја даваат на Вардар можат да бидат голем предизвик за секој противник.

„Да се игра против Вардар во нивната сала значи да се почувствува неверојатна атмосфера. Може да биде многу тешко, затоа што има огромна бучава и многу луѓе кои постојано го туркаат својот тим напред. Но, за луѓето кои го сакаат ракометот, тоа истовремено е прекрасно искуство и дополнителна мотивација. Гледате дека сите даваат сè од себе за натпреварот, а тоа ви помага и вие да го направите истото“, изјави Реј Моралес.

Дефанзивниот специјалист летово го замени Охрид со Висла, но добро ги памети натпреварите во Македонија и гостувањата во „Јане Сандански“. Во четврток ќе биде на спротивната страна од „црвено-црните“, а неговите совети сигурно ќе им бидат значајни на соиграчите при подготовката за атмосферата што ги очекува во Скопје.

Тој беше избран за најдобар дефанзивец во лигата во Македонија, во изборот на 24Ракомет. А и Иван Чупиќ тренерот на „црвено-црните“ изјави дека Висла игра најдобра одбрана, што дополнително го прави натпреварот интересен во четврток во Скопје.

❗❗  Следете не на нашите социјални мрежи, на Facebook, и на Instagram и бидете дел од Viber заедницата на 24Ракомет – добивајте ги сите информации веднаш на вашиот телефон…

Иван Чупиќ е задоволен од развојот на младите ракометари кои тренираат со првиот тим на Вардар.

Тројцата талентирани играчи – Николче Нечовски, Бобан Поповски и Марко Ѓорчески, веќе ја почувствуваа атмосферата во „Јане Сандански“, патувањата и настапите со сениорската екипа, но тренерот смета дека допрва треба да добиваат поголема минутажа.

„Сите тројца работат многу добро. Физички и тактички се подготвени и се гледа дека добро се вклопија во тимот. Нормално е во овој момент да постои разлика во квалитетот во однос на поискусните ракометари, но им недостига уште индивидуална работа. Тоа што тренираат со првиот тим, гледаат видеа, патуваат и играат пред полна сала сигурно ќе им донесе големо искуство“, истакна Чупиќ.

Неговата желба е младите ракометари да не останат само дел од тренинзите на првиот тим, туку редовно да играат и натпревари.

„Кога нема да играат за првиот тим, мора да настапат за вториот тим. По една добра работна недела со сениорите, на крајот од неделата мора да имаат натпревар. Младиот ракометар не смее времето да го поминува само на видео анализа, во сала за вежбање и во подготовка за следниот натпревар. Нему му е потребен посебен процес и индивидуална работа.“

Чупиќ верува дека тројцата млади играчи имаат иднина во Вардар, а клубот ќе покаже трпение во нивниот развој.

„Вардар нема многу трпение кога се во прашање резултатите, што е нормално за клуб од ваков ранг. Но, ние како стручен штаб и клуб имаме трпение за младите и веруваме во нив. За две или три години, со добра работа и ако останат цврсто на земја, ќе добијат можност да играат за Вардар.“

Стратегот на „црвено-црните“ објасни и како се гради вистинскиот клупски идентитет.

„Кога ќе донесете дете на 16 или 17 години, по три сезони тоа дете е вардарец. Ако донесете македонски ракометар на 25 или 28 години, тој ќе игра, ќе помогне и ќе ја зема својата плата, но никогаш нема да биде вардарец на ист начин. Затоа сакаме да ја зголемиме базата на деца и базата на вардарци“, порача Чупиќ.

Ракометарите на Еурофарм Пелистер води со 17-16 по првиот дел на мечот против Вибжеже Гдањск од второто коло во Лигата на Европа.

Домашните отворија со 2-0, но битолчани потоа ја зацврстија одбраната, во нападот лесно доаѓаа до позиција и направија серија од пет гола по ред за 5-2. Беше и 6-3, пред Гдањск да остане без Гебала, кој доби казна од две минути.

Toа не го искористи македонскиот вицепрвак и домашните успеаја да се вратат во егал на 6-6. Н’танзи и Кузмановски диригираа во нападот на битолчани и се играше гол за гол, а Хеидарирад беше одличен на голот.

Но и домашниот голман Жембрицки исто така беше солиден, па не дозволуваше Еурофарм Пелистер одново да се одлепи. Червар ги ротираше сите ракометари, па играа и Ристевски, Серафимов, Калајџиески…

По 8-8 имаше дури осум израмнувања на резултатот до 16-16 на влезот на последната минута. Кузмановски тогаш со играч на грбот погоди во голот на Гдањск, Хеидарирад фати „жива топка“ на домашните, но нашиот тим не реализира во последниот напад и на пауза замина само со плус еден, 17-16.