Откако стана јасно дека Дика Мем ќе ја напушти Барселона во 2027 година и ќе им се приклучи на Гидсел и Питлик во Фуксе Берлин, веднаш започнаа шпекулациите за следниот голем чекор на каталонскиот гигант.
Според информациите од Португалија и пишувањата на „Handball Basse“, Франциско Кико Кошта, една од најголемите млади ѕвезди на Спортинг Лисабон, е прв на листата на желби на Барса.
Кико и неговиот постар брат Мартим Кошта, кои играат под водство на својот татко Рикардо Кошта, лани ги продолжија договорите со Спортинг до 2030 година. Но ситуацијата наскоро би можела да добие сосема нов правец.
Браќата потпишале со истата менаџерска агенција што се грижи за кариерите на Кристијано Роналдо и суперталентот Ламин Јамал, што јасно укажува на амбиции за трансфер надвор од Португалија.
Неофицијално, отштетата за Кико Кошта би изнесувала околу 1 милион евра, а исто толку и за Мартим. Ако Барса реши да реагира порано, и ако финансиските услови го дозволат тоа, можно е трансферите да се реализираат многу пред 2027 година.
