Машката кадетска репрезентација на Македонија загуби во полуфиналето на силниот „Шпаркасен Куп“ од селекцијата на Исланд со 30-27 и ќе се бори за третото место. Нашите момци одиграа храбро, но еден лош период во вториот дел беше клучен за Исланд да поведе со четири гола, и беше тешко да се вратиме во натпреварот.
Исланд поведе со 2-0, но Узунчев намали набрзина, а потоа и Димковски погоди со играч поммалку за 2-2. Потоа се играше гол за гол до 6-6, пред „рибарите“ да искористат две наши грешки и повторно да стигнат до плус два, 8-6.
Беше и 10-8 за Исланд, но Субашевски и Карасманакис одново го вратија мечот во егал, 10-10. До крајот на полувремето имаше уште по два гола на двете страни и на пауза се замина со 12-12.
Вториот дел тргна со водство за Македонија, но Исланд секогаш израмнуваше. По 17-16 за нашите кадети, следуваше „црна дупка“ и Исланѓаните го искористија тоа за првпат во мечот да стигнат до највисока предност во мечот, 20-17.
Димковски и Субашевски намалија на 20-19, но потоа следуваше уште еден пад во нашата игра и Исланд се одлепи на 27-23 на десет минути до крајот. Предноста на „рибарите“ во следниот период се движеше меѓу три и четири гола.
По тајм-аутот на Стојановиќ на три минути до крај, промашивме пенал за минус два, а потоа веќе немаше време за камбек во мечот. Субашевски беше стрелец на седум гола, по пет постигнаа Узунчев и Калајџиески, четири пати во листата на стрелци се запиша Карасманакис, додека три гола даде Димковски.
Ривал на Македонија ќе биде поразениот од средбата меѓу Германија и Египет, а мечот ќе започне од 18:30 часот.
ПОВРЗАНИ ВЕСТИ
