Конкурентот на Еурофарм Пелистер за осминафинале во ЛШ – Висла Плоцк со голот на Шушња во последните секунди го совлада Динамо Букурешт со 27:26 и пак е чекор пред битолчани.
Македонскиот шампион утре игра против Фуксе Берлин, додека во последното коло од групната фаза во Битола ќе го пречека ПСЖ. Висла Плоцк во последното коло е домаќин на Спортинг Лисабон, кој има обезбедено најмалку осминафинале.
Двете екипи играа промениво во текот на целиот натпревар, најпрво водеа домаќините, потоа гостите ја презедоа контролата, а по 30 минути игра беше нерешено, 14:14.
Во вториот дел продолжи неизвесноста и само нијанси одлучуваа каков ќе биде исходот. Избраниците на Хавиер Сабате иако имаа кризен период, губеа со 22:19, направија серија од 5:0 и во 55 минута поведоа со 24:22.
Домаќините не се предаваа, се вратија во игра, но на крај наместо да земат бод, останаа со празни раце, а бодовите заминаа за гостинскиот тим.
Предводник во победничката екипа беше Крајевски со седум погодоци, пет од пет имаше репрезентативецот на Унгарија, Герго Фазекас, четири додаде Пирох.
Алборг на свој терен славеше против Загреб со 33:30 (15:17) и му ги сведе на теорија шансите на хрватскиот шампион за евентуално осминафинале.
Загреб од самиот старт, па до 40 минута одржуваше резултатска контрола, но не издржа до крајот. Иако даде сѐ од себе, сепак, домаќините со одличната игра во последниот дел дојдоа до многу важна победа.
Алборг со освоената победа го презеде второто место во групата Б, сега има 17 бода на свое конто.
Хрватскиот шампион во последното коло од групната фаза на свој терен ќе го пречека Келце, но за избраниците на Петковиќ натпреварот со полскиот тим нема да има никакво значење.
