По поразот од Порто во Лигата на Европа, ракометарите на Вардар се вратија на победничките патеки, откако славеа против Тиквеш во Кавадарци со 32-23 во натпреварот од 9 коло во суперлигашкото друштво.
Домаќинот одржуваше чекор со фаворитот, особено во првиот дел, а почна да попушта во средината на второто полувреме. „Црвено-црните“ доминираа во последните петнаесетина минути, а претходно кавадарчани успешно се носеа со гостите.
Ниту една од екипите немаше предност поголема од два разлика, на паузата беше 12-11 за Вардар, а клучната серија направена по негативата на гостите, 18-17. Со серија од пет погодоци избраниците на Владо Недановски го свртеа резултатот и поведоа со 22-18.
Домашните не можеа да се вратат во мечот, попуштија и со реализацијата, па Вардар ги казни сите грешки, и само рутински го доврши мечот за убедлива победа. Најдобри стрелци во победничкиот тим беа Маргели со осум гола, Крсманчиќ имаше шест реализации, додека во составот на Тиквеш, Анастасовски и Манасков имаа по пет погодоци.
Вардар му гостува на Порто во вторник, а следен предизвик во Супер лигата ќе му биде дуелот со Охрид, додека Тиквеш во следното коло ќе ја пречека екипата на Струга во Кавадарци.
ПОВРЗАНИ ВЕСТИ
