Женската репрезентација на Македонија ја очекува последниот натпревар од квалификациите за ЕП 2026.
Избраничките на Кристијан Грчевски гостуваат кај Словенија, која веќе има билет за континенталниот собир, па ќе влезе без притисок.
Македониа може до ЕП само како третопласирана, а за да биде меѓу најдобрите четири од шесте квалификациски групи може со победа, реми или пораз, кој нема да биде многу висок.
„Во недела не чека натпревар против репрезентацијата на Словенија, ќе биде тежок натпревар и мора да го сфатиме сериозно. Тргнувајќи од себе, а и од сите девојки очекувам да го дадеме максимумот, да играме со срце и да се претставиме во најдобро светло. Ако бидеме сплотени и дадеме се од себе, ќе стигнеме до позитивен резултат, а со тоа и ќе се квалификуваме на ЕП“, изјави Џатевска.
Натпреварот меѓу Словенија и Македонија ќе се игра в недела во „Рдеча Дворана“ во Велење од 18:00 часот.
