Денеска со две средби во Скопје и Битола ќе биде комплетирано 7 коло во Супер машката лига.

Ракометарите на Вардар и Бутел Скопје ќе го одиграат својот меѓусебен дуел меѓу двете европски обврски.

Вардарци в среда ги чека гостување кај Нант во Лигата на шампионите, додека Бутел Скопје в сабота ќе игра реванш против хрватската Горица од ЕХФ Купот.

Од 18:00 часот во салата „Боро Чурлевски“ ќе се игра средбата меѓу Еурофарм Пелистер 2 и Тиквеш која се очекува да донесе возбудувања на теренот.

ДЕНЕСКА НА ТЕРЕНИТЕ:

12:00 ВАРДАР – БУТЕЛ СКОПЈЕ (МАКЕДОНИЈА)
18:00 ЕУРОФАРМ ПЕЛИСТЕР 2 – ТИКВЕШ (МАКЕДОНИЈА)

По 15 години минати низ некои од најголемите европски клубови, Кент Робин Тонесен се враќа дома. Норвешкиот репрезентативец од летото 2027 година повторно ќе го носи дресот на Фјелхамер, клубот во кој започна неговата ракометна приказна.

Трансферот сега е и официјално потврден. Тонесен потпиша двегодишен договор како играч, а истовремено ќе добие и постојано работно место во клубот како координатор за маркетинг и спорт.

„Сите што ме познаваат знаат колку многу ми значи Фјелхамер. Да се вратам и да му дадам нешто назад на клубот многу ми значи“, изјави Тонесен за ТВ2.

За 35-годишниот леворак бек ова ќе биде затворање на еден огромен европски круг. Од Норвешка замина во 2012 година, а потоа настапуваше за Савехоф, Вецлар, Фуксе Берлин, Веспрем, ПИК Сегед, ПСЖ и Флензбург. Со Веспрем и Сегед освојуваше титули во Унгарија, а со ПСЖ стана шампион на Франција во 2024 и 2025 година.

Иако заминува од врвниот европски ракомет, Тонесен потенцира дека враќањето во Фјелхамер не го гледа како мирно пензионирање.

„Не се враќам за да успорам. Сакам да придонесам на теренот и да бидам важен играч за тимот“, порача Норвежанецот.

Во Фјелхамер очекуваат неговото влијание да биде многу поголемо од она што ќе го покаже на натпреварите. Клубот сака да го користи огромното искуство што го стекна во најсилните европски првенства и во Лигата на шампионите, особено во работата со младите ракометари. Тренерот Кристијан Близнак, кој во минатото беше и соиграч на Тонесен во Вецлар, смета дека неговото присуство ќе биде исклучително значајно за развојот на клубот.

Враќањето дома доаѓа и по еден многу тежок период за искусниот бек. За време на летниот одмор во Хрватска, Тонесен доби херпес зостер во пределот на лицето и окото. Состојбата беше толку сериозна што во еден момент постоеше и страв за неговиот вид, а самиот подоцна откри дека првите три недели биле исклучително тешки.

Во меѓувреме се врати на тренинзите и повторно почна да игра, а за ТВ2 порача дека сега состојбата е добра. Сето тоа дополнително влијаело на одлуката да се врати во Норвешка со семејството.

Тонесен зад себе има и богата репрезентативна кариера. За Норвешка одигра 148 натпревари и постигна 360 голови, а со националниот тим освои сребрен медал на Светското првенство во 2017 година. Последниот голем турнир на кој настапи беше Светското првенство во 2025 година.

▶▶▶  Добивај директно РАКОМЕТНИ ВЕСТИ на твојот мобилен телефон
Приклучи се на VIBER – https://abit.ly/viber-24rakomet . Со еден клик до сите вести.

Европската ракометна федерација ги делегираше официјалните лица за натпреварите од второто коло од ЕХФ Европскиот Куп.

Македонската двојка Методија и Михајло Илиевски добија делегирање и ќе ја делат правдата на натпревар во Полска.

Станува збор за првата пресметка меѓу полската Островија и турскиот состав Истанбул Генчлик што ќе се игра утре.

Мечот на кој делегат ќе биде Хашани од Косово, ќе стартува од 18:00 часот во „Арена Остров“ во Остров Виелкополски.

Шестото коло во Лигата на шампионите кај дамите донесе убедливи победи на Есбјерг и Ференцварош, големо изненадување во Букурешт, како и драматични завршници во Љубљана и Оденсе.

Ференцварош останува единствениот тим со максимален учинок, додека норвешка Сола ја забележа втората победа во историјата на клубот во елитното натпреварување, а прва оваа сезона.

Лига на шампиони, 6 коло, резултати:

група А
Ференцварош – Борусија Дортмунд 39-25
Есбјерг – Брест Бретањ 35-26
Крим – Будуќност 24-23
ЧСМ Букурешт – Сола 22-30

група Б
Глорија Бистрица – Сторхамар 33-26
Мец – Бломберг 32-22
Оденсе – Ѓер 31-32
Подравка – Никобинг 33-26

Ференцварош ја продолжи победничката серија

Унгарскиот состав го скрши отпорот на Дортмунд во второто полувреме, во кое постигна 23 гола. Клучна беше серијата од 7-0, со која предноста од 20-16 порасна на 27-16. Ана Кристенсен имаше 18 одбрани, а Петра Симон и Катрин Клујбер постигнаа по осум гола. Ова беше 150 победа за унгарскиот состав во историјата на Лигата на шампионите.

Реистад со десет гола во дербито на колото

По израмнетото прво полувреме, данскиот тим направи клучна разлика по паузата и стигна до убедлива победа. Хени Реистад беше незапирлива со десет гола, додека Кјара Чиманга постигна пет за Брест. Францускиот тим го претрпе вториот последователен пораз во натпреварувањето.

Победа во последните секунди

Крим конечно ги освои првите бодови во сезоната по драматичен натпревар со Будуќност. При резултат 23-23, домашниот тим остана со играч помалку, а гостинките не реализираа седмерец. Казната стигна преку Нина Жулиќ, која погоди од контранапад за голема радост на словенечкиот состав. Жулиќ и Јована Скробиќ постигнаа по осум гола во двата тима.

Норвежанките приредија изненадување

Сола го шокираше ЧСМ во Романија и ја забележа втората победа во историјата на Лигата на шампионите. Гостинките имаа контрола во најголемиот дел од натпреварот, а во второто полувреме ја искористија слабата реализација на домаќинките и поведоа со пет гола разлика. Камила Херем и Пија Гронстад постигнаа по пет гола, додека Ема Фрис беше најефикасна кај ЧСМ со седум.

Бистрица во вториот дел го скрши Сторхамар

Романскиот состав славеше на домашен терен во натпревар во кој Сторхамар успеа да поведе во првото полувреме, но домаќинките ја презедоа контролата пред паузата. Клучна беше серијата од 8-2 во вториот дел, со која Бистрица се одлепи на 27-20. Данила Со Делгадо беше најдобра со десет гола, додека Анастасија Марсениќ постигна шест за Сторхамар.

Шампионките го решија мечот по паузата

Мец се намачи во првото полувреме против германскиот дебитант, кој успеа да се врати на 13-13. Сепак, домаќинките ја вратија предноста пред паузата, а во вториот дел ја засилија одбраната и му дозволија на противникот да постигне само осум гола. Лилу Борг постигна шест гола за Мец, додека Макси Милнер и Нурија Бухер имаа по седум за Бломберг.

Унгарскиот гигант се извлече во драматична завршница

Ѓер ја запиша 14 победа во 16 меѓусебен дуел со Оденсе, но мораше да се помачи до самиот крај. Домашниот тим се врати од негатива од три гола и израмни на 28-28, но гостинките беа посигурни во последните минути. Тјаша Станко постигна осум гола за Ѓер, исто колку и Роми Маршалкеверд за Оденсе.

Хрватскиот првак стигна до вториот триумф

Подравка одигра одлично на домашен терен и уште во првото полувреме создаде солидна предност против Никобинг. Данскиот тим имаше проблеми со реализацијата и ротацијата, а голманката Аница Гудељ забележа 11 одбрани. Матеа Шошо беше најефикасна кај победничкиот тим со седум гола, додека Клара Лерби постигна осум за Никобинг.

Женската репрезентација на Македонија денеска го имаше собирот во рамките на ЕХФ неделата, а селекторот Игор Марковиќ за оваа акција смета на 21 ракометарка.

Во споредба со претходниот собир ги нема Ангела Јанкуловска, која ќе го пропушти ЕП и целата сезона поради повреда, потоа Ана Марија Коларовска, Софи Гошевска и Моника Килдан Јанеска.

Нови имиња се Теодора Дукоска, Михаела Кралева, Јована Мицевска Митев, Сара Богојеска и Александра Коловска.

Во оваа акција, ракометарките нема да играат пријателски натпревари, кои се на програмата во ноември пред Европското првенство.

Македонија ќе биде дел од меѓународен пријателски турнир во Турција, каде освен против домаќинот ќе тестира и против Финска и Италија од 26 до 28 ноември.

По турнирот во Турција, Македонија заминува за Клуж Напока, каде што ќе игра против Швајцарија, Романија и Норвешка на ЕП.