Со натпреварот меѓу Струга и Скопје, кој ќе се одигра во текот на утрешниот ден, ќе стартува новото, 8. коло во плеј-оф/аут фазата во македонската елита.
Дербито на колото ќе биде во Автокоманда каде ќе се сретнат Алкалоид и Тиквеш.
Екипата на Алкалоид со победата над Вардар во минатото коло се вклучи во борбата за шампионската титула. Првиот меѓусебен дуел меѓу двете кипи заврши без победник, 31:31.
Тиквеш со евентуална победа над амбициозниот дебитант ќе направи голем прогрес во походот кон место во Европа. Моментално, Тиквеш се наоѓа на 4. позиција на табелата со 10 бода на свое конто.
Судии на дуелот во Автокоманда ќе бидат Димитар Митревски и Благојче Тодоровски во Битола.
Интересен дуел се очекува во Охрид каде истоимената екипа за ривал го има Еурофарм Пелистер 2. Охриѓани со триумфот против Бутел Скопје излегоа од резултатската криза и останаа во игра за подобар пласман во најсилното натпреварување во Македонија.
Бутел Скопје гостува во Битола кај првиот тим на ,,фармацевтите”, додека актуелниот шампион Вардар за следен ривал го има тимот на Пролет.
Во борбата за опстанок, исто така се очекуваат неизвесни дуели, во кој секој бод ќе биде од голема важност да се биде дел од најдобрите екипи во следната натпреварувачка сезона.
По прва победа во плеј-аут фазата ќе атакува „фенерџијата“ Радовиш. Тимот на Љупче Мијалов ќе се обиде да го изненади Прилеп и да ги освои првите бодови.
Двете екипи во претходното коло беа поразени од Голден Арт, односно Струга. Прилепчани се далеку од опасната зона за испаѓање, имаат четири победи во плеј-аутот и се позиционирани на трето место.
Лидерот Куманово на домашен терен силите ќе ги одмери со Јуниор КВ. Избраниците на Игор Котевски имаат одлични партии во вториот дел од сезоната и на утрешниот дуел се очекува да продолжат со исто темпо.
Голден Арт против Вардар Неготино ќе бара нови бодови за одржување на шансите за првото место во плеј-аутот. По нови бодови ќе атакува и Струга, која пред својата публика ќе го пречека Скопје.
Суперлига, 8 коло, плеј-оф-аут, распоред:
07/04, 17:00 Струга – Скопје
07/04, 19:30 Куманово – Јуниор КВ
08/04, 16:00 Еурофарм Пелистер – Бутел
08/04, 17:00 Голден Арт – Вардар Неготино
08/04, 19:00 Охрид – Еурофарм Пелистер 2
09/04, 12:00 Пролет -Вардар
09/04, 17:00 Радовиш – Прилеп
09/04, 20:00 Алкалоид – Тиквеш
ПОВРЗАНИ ВЕСТИ
