Екипата на Струга во натпревар од 3. коло од плеј-аут фазата ќе гостува во Прилеп кај истоимената екипа.
Стружани токму во Прилеп ќе ја бркаат првата победа во борбата за опстанок.
Ракометарите на Струга на првите два натпревари беа неочекувано поразени од Куманови и Скопје.
Тренерот Жарко Ферукоски истакна дека и покрај двата воведни порази на стартот, неговиот тим максимално е концентриран за неделниот дуел.
,,Во Прилеп одиме на победа, имаме мала резултатска криза, но добро се работеше во текот на оваа недела. Играта на ривалот е анализирана, играчите ни се добро познати, освен во регуларниот дел, одигравме контролен натпревар против Прилеп пред почетокот на вториот дел од сезоната. Станува збор за квалитетна екипа, која не треба да се потцени, ние ќе го дадеме максимумот и ќе се потрудиме да дојдеме до првите бода”, изјави Ферукоски.
Голманот Дамјан Тутенкоски очекува победа на незгодното гостување во Прилеп.
,,Во недела гостуваме во Прилеп, моите очекувања се да ја оствариме првата победа во плеј-аутот, откако загубивме од екипите на Куманово и Скопје. Мислам дека сме поквалитетна екипа, секако, ќе дадеме се од себе на овој натпревар за да си заминеме со победа од незгодното гостување”, изјави Тутенкоски.
Натпреварот меѓу Прилеп и Струга ќе се одигра на 26 февруари со почеток од 15:00 часот во салата при СОУ „Ристе Ристески-Ричко“.
