Екипата на Металург нема да има можност да ја брани титулата во Купот на Македонија освоена пред две години откако денеска во првото полуфинале загуби од Вардар со 22:27.
Шампионот на Македонија успеа да го добие дуелот во салата во „Автокоманда“ откако имаше подобра игра во поголемиот дел од средбата и контрола на резултатот. Иако и металурзите имаа свои моменти, сепак, вардарци беа тие кои во второто полувреме постојано беа во предност.
Од почетокот на натпреварот стартуваше надигрувањето. Металург поведе со 2:0, а потоа следуваа шест гола од Вардар. Во 11. минута резултатот беше 8:3. И тука ракометарите на Вардар како да застана. Многу тешко доаѓаа до голот на Дупјачанец, а откако за 11 минути имаа осум гола во следните 11 имаа само еден. Имаше комплетен пресврт и Металург водеше со 10:9.
Иако тимот од Автокоманда дојде до водство не успеа и да го задржи. Брзо дојде до консолидирање на редовите на Вардар и на полувреме беше, 14:12.
Стартот на второто полуврмее го реши победникот на овој дуел. Петте гола на „црвено-црните“ пресудија околу тоа кој ќе биде првиот финалист на годинешното издание од Купот на Македонија. Задачата беше одработена добро и без поголеми проблеми петте седумте гола предност беа зачувани. Иако на моменти металурзите намалуваа до пет гола, сепак, беше тешко да се дојде до нешто повеќе.
До крајот се одигра мирно и се чуваше водството така што немаше никаков проблем за да се дојде до победа од 27:22 и пласман во финалето, па сега ќе може мирно да се чека подобриот од дуелот меѓу Еурофарм Пелистер и Бутел Скопје.
МЕТАЛУРГ – ВАРДАР 22:27 (12:14)
Сала: „Автокоманда“ во Скопје. Судии: Димитар Митревски и Благојче Тодоровски од Битола. Делегати: Душко Камишевски и Русе Наумовски од Скопје.
МЕТАЛУРГ: Дупјачанец, Ѓорѓески, Петковски, Поповиќ 3, Кофиловски, Шилегов, Хорват 4, Калуѓеровиќ 6, Серафимов 6, Лазаревски, Тарабокија, Тодески, Митиќ 1, Рниќ, Додиќ 1, Маркоски 1.
Седмерци: 3/5, Исклучувања: 4 мин.
ВАРДАР: Ристовски 1, Кизиќ, Шеваљевиќ 1, Валчак 3, Јагуриновски, Стоилов, Георгиевски 2, Карапалевски, Дисингер 5, Јотиќ 6, Калараш, Чупиќ 7, Талески, Дибиров 2, Векиќ, Мишевски.
Седмерци: 2/2, Исклучувања: 8 мин.
