Репрезентацијата на Словенија во рамки од последното коло од главната фаза на Светското првенство 2025 ќе ги одмери силите со Хрватска.
Иако избраниците на Урош Зорман немаат за што да се борат, сепак, посакуваат освојување на бодовите за подобар пласман на Мундијалот.
Организаторот на играта на Словенија, Миха Зарабец, во изјава за словенечките медиуми вели дека ќе се потрудат да им ги расипат математиките на Хрватите.
,,Сакаме да одиграме како што знаеме. За нас натпреварот е како медал, би можеле да им уништиме сè и да си ја вратиме својата чест. Гледаме што зборуваат Хрватите по победата над Исланд. Тие сметаат дека се веќе во полуфиналето, не во четвртфинале. Летаат во облаци, а тоа треба да нè запали. Не се плашиме од никој, иако знаеме дека уште не сме одиграле совршени 60 минути на Мундијалот. Сега е време да уживаме и да го покажеме тоа што досега не бевме“.
На Хрватите им е потребна било каква победа над Словенија за место меѓу најдобрите осум репрезентации.
