Српскиот стратег Борис Ројевиќ од лето би требало да седне на клупата на амбициозниот Охрид, пишува Моцарт Спорт. Според српскиот медиум, договорот меѓу двете страни е веќе постигнат, а наскоро треба да биде и официјализиран.
Охриѓани сакаат да играат важна улога во македонскиот ракомет и да влезат во големата тројка во која доминираат Вардар, Еурофарм Пелистер и „сино-белиот“ тим од Автокоманда.
Во Охрид веќе играат двајца ракометари кои работеа со Ројевиќ во минатото – кружните напаѓачи Владимир Бојаниќ и Живан Пешиќ.
Ројевиќ по седум сезони минати во Војводина, си поднесе оставка на функцијата по поразот од Порто во Лигата на Европа, а српскиот првак вчера го потврди заминувањето.
Српскиот стратег во сезоните во кои седеше на клупата на тимот од Нови Сад освои голем број трофеи, а оваа сезона веќе имаше два – во Супер Купот и во Сесрпскиот Куп.
Но потоа следуваа два порази од амбициозниот Партизан во шампионатот, кои ги разнишаа редовите на Војводина и оттогаш беше јасно дека нешто не штима во тимот од Нови Сад.
