Вардар привремено ќе биде лидер на табелата во разигрувањето за титулата откако очекувано, но не така лесно го победи Бутел со 35-26 (18-14). Тимовите се договорија својот меч од 2 коло од плеј-офот да се игра во „Јане Сандански“, а следниот во Бутел, па за „црвено-црните“ ова беше втор меч пред дoмашна публика.
По исцрпувачкиот дуел во дербито со тимот од Автокоманда, овој меч им дојде со помалку тензија, иако Бутел покажа повеќепати дека секогаш може да ги искористи шансите што му се укажуваат. Настапија вардарци без шестмина ракометари, кои од различни причини останаа на трибините (Георгиевски, Хансер, Мело, Аларов, Крсманчиќ, Коиј), но и без нив ги освоија очекуваните два бода. Вардарци играа само со еден класичен пивотмен, Лазаревски целиот меч го мина на клупата, а целосна шанса во одбранa и во напад доби Томче Стојановски.
Двата голмани Бојан Блажески кај Бутел и Васил Гогов кај Вардар, „доминираа“ во првото полувреме, и заедно запишаа вкупно 19 одбрани. Поуспешен беше Гогов кој имаше десет успешни интервенци, но Блажески одбрани еден пенал.
Двапати само „домаќините“ има водство, на почетокот, 2-1 и 3-2, а потоа се беше во знакот на „црвено-црните“. Во 12. минута веќе имаа „плус 4“ разлика што неколкупати ја има до крајот на првите 30 минути. Потоа дојода и највисоките 14-9, а потоа и 17-12. Но, Бутел си продолжи со својата игра и намали на 14-17 во 28 минута. Можеа домашните во соблекувалната на пауза да заминат и со три гола негатива, но Васил Гогов во последните секунди имаше двојна одбрана не дозволувајќи да прими гол.
Веќе во 35 минута Вардар го имаше највисокото водство, 21-15, но во следниот напад на домашните Вуко Борозан го доби третото исклучување, и поради тоа ја напушти играта, па Вардар мораше да продолжи без него. Бутел остана без Тео Тодески која го повреди зглобот на ногата.
Бидејќи Томче Стојановски мораше повремено да одмара, а Милан Лазаревски не влезе во игра, на линијата од шест метри во напад за Вардар играше Дмитро Горига. Шутерот и на таа позиција добро се наоѓаше, иако играше и во одбрана истовремено. Последните 15 минути од мечот почнаа со предност на Вардар од 27-22.
Колку што голманите беа добри и фатија многу топки во првото полувреме, толку имаа спротивни перформанси во второто полувреме. Еспиња го замени Гогов, но не беше нималку успешен како Васил. Блажески исто така имаше двојно помалку одбрани од првото полувреме, но вкупно одбрани 14 упатени топки кон неговиот гол, што е ист број голови како и тројцата голмани на Вардар.
Во 51 минута Вардар првпат имаше „плус 7“ гола предност и како да го скрши отпорот на Бутел. Можеше Горига да зголеми на повеќе, но направи престап, а во контра Бутел намали на 30-24. Немаше време за пресврт, бидејќи Вардар знаеше да го контролира резултатот и играта, и да задржи и време. Дојдоа и највисоките дотогаш, „плус 8“, 32-24, и беше се јасно.
Филип Николов со 12 гола беше најефикасен на мечот, и во екипата на Бутел. Кај Вардар девет гола даде Маргели.
