Македонскиот претставник во Лигата на Европа, „сино-белиот“ тим од Автокоманда ќе има тешка задача во реваншот против германскиот Хановер.
Бундеслигашот славеше убедливо на првата пресметка со 37-27 и се наоѓа на милиметри до пласман во групната фаза од второто по ранг европско клупско натпреварување.
Тимот на селекторот Лазаров успешно парираше на силниот бундеслигаш до 11-11 во првите петнаесетина минути. Потоа колата тргна „удолу“ и до паузата Хановер поведе со 19-15.
На стартот на второто полувреме Велковски доби црвен картон, па македонскиот состав дополнително беше ослабен и домаќинот уште повеќе доминираше. До крајот само ја зголеми разликата за конечните десет гола.
Голманите Кизиќ и Галевски имаа девет одбрани, а на спротивната страна брилјираше Биркел со 18 интервенции, додека Гаде фати еден удари.
Момците на Лазаров промашија дури пет пенали од десет, а ударните игли во нападот Борзаш и Серафимов имаа 6 гола од 17 обиди. Најдобар стрелец беше исландското левото крило Тордарсон со десет погодоци од 16 обиди. Во победничкиот состав се истакна Стеинхаусер со 11 голови.
Реваншот се игра следната недела на 6 септември во спортската сала Автокоманда со почеток во 19:30 часот.
