Тимот на Драчево Јуниор славеше на гостувањето кај составот на Текстилец со 31-25 во натпреварот од 12 коло во Првата лига. Сега Драчево Јуниор има 18 бодови што е доволно за третото место зад лидерот Младост Богданци со 22 и „витамините“ од Автокоманда кои имаат 20.
Домашните кои оваа сезона играат одлично и се тврд орев за сите фаворити во прволигашката конкуренција, ја имаа контролата во првото полувреме.
Предводен од Џинес и Атанасовски, кои мечот го завршија со по седум гола, штипскиот тим на паузата водеше со 14-13.
Беше 16-16 на стартот на вториот дел, а за само пет минути Драчево Јуниор казни неколку домашни грешки, се одлепи на плус четири, 20-16.
Потоа се беше полесно и избраниците на Велимир Настески умешно ја задржаа предноста до самиот крај за нов триумф.
Во победничкиот состав се истакна Михаил Цветановски со 11 погодоци.
