По поразот од Охрид во првото коло од суперлигашкиот плеј-оф, тимот на Бутел Скопје ќе игра против двократниот европски првак Вардар.
„Црвено-црните“ имаа победнички старт на битката за титулата, а сигурно ќе посакуваат продолжување на серијата.
Левото крило на Бутел Скопје, Дамјан Субашевски, се осврна на мечот со Охрид, во кој бутелци покажаа карактер и се вратија во вториот дел по големата негатива.
„Добро бевме подготвени за натпреварот со Охрид, можеби еден од најбитните натпревари, иако е почеток на плеј-оф. Од премногу желба лошо отворивме, но успеавме да се вратиме кон средината на второто полувреме. Заслуживме барем реми на овој натпревар, но немавме среќа на крајот. Иако сме млада екипа покажавме карактер и голема борба и дека можеме да играме со секоја екипа од плеј-оф“, вели младинскиот репрезентативец на Македонија.
Субашевски вели дека Вардар е фаворит, но ветува дека тој и соиграчите ќе дадат 200% на овој натпревар.
„Екипата на Вардар имаше победнички старт и секако дека е фаворит на овој натпревар, но ние ќе дадеме 200% како и на секој натпревар и ќе се обидеме да го изненадиме противникот со нашата брза игра и цврста одбрана. Вардар има силна одбарана со многу корпулентни играчи, но исто така и брз напад со одлични бекови од каде што доаѓа најголемата опасност. Ќе се обидеме да ги спречиме ако успееме во тоа сигурен сум дека ќе имаме добар натпревар“, заврши Субашевски.
Натпреварот меѓу Бутел Скопје и Вардар се игра утре со почеток од 18:00 часот во СЦ „Јане Сандански“.
