Тимот на Драчево ја запиша втората победа во прволигашката конкуренција, откако на домашен терен славеше против Шампион со 40-34.
Лазар Стојанов со девет и Димитар Петковски со осум гола беа предводници во тимот на Велимир Настески, додека Борјан Лалов и Петар Ферукоски имаа по шест реализации.
Домаќините водеа и со десет гола во првиот дел, на пауза се замина со 22-15, а во вториот дел црвен картон поради трите исклучувања кај Шампион, доби еден од најдобрите Илија Пејковски.
Немаше многу возбудувања, Драчево рутински ја одржуваше разликата и не дозволи никакво изненадување. Во тимот на Шампион најдобри стрелци беа Пејковски и Ѓиноски со по шест гола.
Вториот тим на „сино-белите“ од Автокоманда славеше против Аеродром со убедливи 49-25. Гостите парираа првите дваесетина минути, но имаа голем пад во финишот на првиот дел и тоа го искористија домашните за плус седум на паузата, 19-12.
Нападот на „витамините“ беше уште повеќе расположен во второто полувреме и постигна дури 30 погодоци, а предничеше десното крило Александар Стојков со 12 гола, додека осум пати погоди Бобан Поповски.
Во составот на Аеродром, пет пати реализираше Ниновски, а по четири гола имаа Иван Ќурчиев и Александар Ристовски.
ПОВРЗАНИ ВЕСТИ
