Македонскиот вицепрвак Вардар си ја закомплицира ситуацијата во борбата за трофејот на регионалниот турнир во Скопје, откако загуби од Војводина со голем пресврт, 28-27.
Иако вардарци имаа водство од 27-20, не дадоа гол до крајот и Војводина со гол во последните секунди успеа да слави.
Вардар доминираа во најголем дел од натпреварот, на паузата беше 17-13, во вториот дел стигнаа до плус седум, 27-20.
Но во последните десетина минути влегоа во „црна дупка“, српскиот вицепрвак ги казнуваше сите грешки и стигна на минус еден, 27-26.
Промашија „црвено-црните“ два пенали и казната стигна преку Додиќ кој погоди за реми, 27-27.
Вардар напаѓаше цела минута, но не реализира и српскиот тим во контранапад со гол се израдува на триумф со голем пресврт.
Утре од 17:00 часот ќе играат екипите на Војводина и Ловќен, додека од 21:00 часот е пресметката меѓу Вардар и Еурофарм Пелистер.
