Со три победи на три меча, од кои последната против големиот ривал Вардар со 25-23 во „Јане Сандански“, ракометарите на Еурофарм Пелистер се освојувачи на трофејот на првиот регионален турнир на кои играа екипи од Македонија, Србија и Црна Гора. За Еурофарм Пелистер ова е трет триумф по ред на дуелите со Вардар, по оној од последното коло од ланското првенство, и на турнирот во Охрид пред една недела.
Битолчани уште од стартот си го фатија редот и по 3-3, се одлепија на плус пет, 8-3, додека вардарци се мачеа да го пронајдат својот ритам. И двата тима настапија без кои своистандардни ракометари.
Сепак до паузата, „црвено-црните“ ја намалија негативата и по првиот дел Еурофарм Пелистер водеше со 14-11.
Во вториот дел продолжи добрата партија на голманот Брестовац, па битолчани отидоа и на плус шест. Во последните десетина минути се влезе со 23-17 за македонскиот првак и Вардар немаше шанси за нешто повеќе на овој дуел.
Последните неколку минути Вардар намали на 25-22, ама за една минута немаше време за пресврт, и „зелените“ од Битола заслужено се радуваа, на победата против големиот ривал и на турнирот.
Претходно битолчани ги победија Војводина и Ловќен и се први на табелата со шест бода, Војводина заврши втора со четири, додека Вардар е трет со два бода од триумфот над Ловќен.
