Денеска се играат натпреварите од третото коло на регионалниот турнир во Скопје кои ќе го дадат првиот освојувач на трофеј на ова натпреварување. Три од четирите екипи имаат шанси да бидат победници, и се ќе зависи од денешните резултати на последниот натпреварувачки ден.
Српскиот вицепрвак Војводина од 17:00 часот ќе се соочи со црногорскиот Ловќен, а на тој натпревар тимот од Нови Сад е голем фаворит. Македонското „ел класико“ се игра од 21:00 часот, и тоа ќе го даде одговорот за освојувачот на трофејот.
Еурофарм Пелистер со реми или победа е сигурен на првото место, но може и со пораз од Вардар да биде прв, во кругот од три тима со по два бода на мини табелата која би се правела доколку трите тима имаат ист број бодови. Тогаш се пресметуваат бодовите и гол разликата само од нивните меѓусебни дуели.
Битолчани славеа против Војводина со 30-29, српскиот тим го победи Вардар со 28-27 и сега Војводина има гол-разлика 0 (57-57). Се ќе се решава на дуелот меѓу македонските екипи.
Во случај Вардар да победи со еден гол, тогаш ќе се создаде круг од три екипи со гол-разлика 0, па ќе решава поголемиот број на постигнати погодоци. Вака Вардар не може да биде прв, само Еурофарм Пелистер или Војводина.
На Вардар само победа од два или повеќе голови му носи трофеј, додека единствена шанса за Војводина да се радува во Скопје е победа на Вардар на Еурофарм Пелистер со еден погодок, но со помалку постигнати голови, 27-26, 26-25, 25-24.
Ако Вардар победи со точен резултат, 28-27, тогаш ќе биде трет на табелата (55-55), а Еурофарм Пелистер и Војводина ќе имаат гол-разлика 0 (57-57). На пелистерци им одговара и пораз од еден гол, но со резултат 29-28, 30-29, 31-30…
Тогаш српскиот тим ќе има повеќе постигнати голови од двата македонски тима и ќе биде прв, во сите други случаи еден од нашите клубови ќе го освои трофејот.
