Хрватскиот тим Сесвете обезбеди пласман во групната фаза од Лига Европа и ќе биде еден од ривалите на македонскиот вицепрвак Вардар. Сесвете е предводен од хрватскиот тренер Жељко Бабиќ кој своевремено беше и тренер на Еурофарм Пелистер.
Сесвете до групите стигна преку квалификациите со екипата на Дуго Село. По поразот на првиот натпревар со 32-29, Сесвете одигра одлично на реваншот и славеше со убедливи 35-24, што им донесе историски пласман меѓу европската елита.
Во групата покрај Вардар и Сесвете ќе играат и Тулуз (Франција) и Кристијанштад (Шведска). Првиот натпревар Вардар ќе го одигра пред својата публика во Скопје на 14 октомври, токму против Сесвете – дуел кој веднаш носи дополнителна регионална возбуда.
Црвено-црните ќе се обидат со поддршката од домашната публика да започнат успешно во новата европска кампања, во група која ветува голема неизвесност и атрактивни натпревари. Целта на „црвено-црните“ е пласман во осминафиналето.
