Кандидатот за претседател на ИХФ, Герд Буцек, излезе со предлог како ракометот да стане популарен на американскиот пазар.
Според него, САД се клучен простор за развој на спортот и таму треба да се бара нов пристап.
„Во модерниот спорт доминираат САД. Нашиот спорт, всушност, е многу американски и треба да се обидеме да се вкорениме токму таму. Можеби дури и со нови форми на игра – на пример, ракомет на кошаркарски терен. Тоа би можело да ја зголеми неговата популарност таму,“ изјави Буцек.
Тој нагласува дека во САД постои само една сала со официјални димензии 40×20 метри, што претставува сериозен предизвик.
„Нереално е да се изградат вакви сали насекаде во следните пет до десет години. Но, можеме да играме на кошаркарски терен – тоа не е толку тешко,“ додаде тој.
Буцек зборуваше и за глобалниот развој на ракометот, истакнувајќи дека Африка е клучниот континент за идни инвестиции, поради очекуваниот демографски бум.
„Ќе формирам тим со кој ќе развиеме концепти за секој континент поединечно, но сè уште е рано да откривам детали.“
