Женската младинска репрезентација на Узбекистан е дисквалификувана од домашното Азиско првенство поради прекршување на старосната граница за настап, каде настапиле постари ракометарки.
Со оваа одлука, тимот не само што го загуби правото на настап на завршницата, туку остана и без билет за Светското првенство во 2026 година. Интересно е дека Узбекистан беше домаќин на ова првенство.
На турнирот во Узбекистан имаа право да настапат ракометарки родени во 2006 година и помлади. Меѓутоа, во документите на три ракометарки беа пронајдени различни години на раѓање – Анастасија Худоерова (2005), Севинч Еркабаева (2004) и Сабина Мулаева (2005). Сите тие настапуваа и на Светското младинско првенство во 2024 година во Македонија.
Азиската ракометна федерација одлучи дека, имајќи предвид дека овие ракометарки немаат право на настап на следното Светско првенство, целата селекција на Узбекистан е дисквалификувана, а резултатите од нивната група се поништени.
Узбекистанската федерација веќе испратила жалба до Меѓународната ракометна федерација (ИХФ), но тоа нема да смени ништо.
