Ракометарите на Прилеп влегуваат во победнички ритам во борбата за опстанок, откако ја забележаа втората победа, овојпат составот предводен од Страшо Илиески триумфираше над Пролет со три гола разлика, 23:20.
Претходните два натпревара од регуларниот дел меѓу овие две екипи завршија без победник. Сега Прилеп со освоената победа го презеде лидерското место на табелата, има шест бода, а Пролет останува на пет.
Како што се очекуваше, натпреварот започна со голема борба на двете страни. По десет минути игра резултатот беше нерешен, 2:2. Искусниот Даскалоски беше одличен на голот на гостите, но неговите соиграчи не успеаја да ги наградат неговите интервенции. Тоа го искористи Прилеп, кој со два брзи гола поведе со 5:3 кон средината на првото полувреме.
И покрај тоа, и домаќините не блескаа во целост. Имаа предност од три гола во 20-та минута, 7:4, беа во можност да дојдат и на плус четири, а гостите тоа не го дозволија. Во првото полувреме беа постигнато вкупно 15 гола, а резултатот гласеше 9:6 во корист за домашниот табор.
За само пет минути игра во вториот дел, избраниците на Матлиески со неколку брзи гола намалија на 11:10. Следуваше вистинска игра на нерви, исполнета со загубени топки, избрзани одлуки и многу цврста одбрана, а составот на Илиески во тие моменти подобро се снајде на теренот и во 40-та минута со голот на Тренчевски конечно дојде до плус четири, 16:12.
По предноста на Прилеп од 17:13, тимот на Пролет намали на 17:15, но прилепчани за две-три минути повторно побегнаа на плус четири, 20:16, и гостите знаеја дека ќе имаат тежок предизвик за кам-бек. Прилепчани одржуваа контрола во последниот период и не дозволија да си направат од готово-вересија.
Најефикасни кај Прилеп беа левиот бек Никола Цветаноски и левото крило Христи Бикоски, двајцата имаа по шест погодоци. Солиден меѓу стативите беше голманот Иван Ангелески. Кај Пролет се истакнаа Доне Мајнов и Ласко Андоновски со по пет реализации.
Прилеп во следното коло ќе го пречека Радовиш и со евентуална победа ќе го задржи максималниот ефект. Пролет втората победа о плеј-аут фазата ќе ја бара на домашен терен против Струга.
