Со натпреварите од 11 коло од машката Супер лига се комплетираше првиот круг од регуларниот дел на сезоната, која има 22 кола, по што ќе се продолжи со разигрување за титулата и за опстанок. Вардар е единствен тим што заврши со максимални 11 победи и има предност од три бода во однос на второпласираниот Еурофарм Пелистер, четири од „соседите“ од Автокоманда, и пет од „гладијаторите“ од Охрид.
Предводникот на листата на стрелците е Здравко Постолов од Радовиш со 65 гола, но интересно неговиот тим е единствен без бод досега, додека на делба на втората позиција се Димитар Димитриоски (Прилеп), Давор Палевски (Пролет) и Мохамед Азиз (Еурофарм Пелистер 2) со по 63 гола, додека ТОП 5 се заокружува со Наум Костов од Струга, кој досега даде 62 гола.
Меѓу најдобрите голмани по бројот на одбрани доминира Благојче Трајкоски од Бутел Скопје со 86, додека втор е голманот на Пролет, Бојан Солев, кој запре 80 одбрани, а трет Мартин Јовановски од Еурофарм Пелистер 2 со 66 одбрани.
*статистика за голманите не е целосна, бидејќи дел од екипите немаат записничари кои работат во новиот систем на РФМ и на некои од натпреварите не се бележат голманските одбрани.
Најмногу освоени топки имаат Ориол Реј Моралес од Охрид (8), Филип Николов од Бутел Скопје (7), како и Димитар Ѓеоргиевски од Бутел Скопје (6) и Александар Василевски од Пролет (6). Најисклучувани во 11 кола – по десет пати, биле Мохамед Азиз (Еурофарм Пелистер 2), Теодор Тодески (Бутел Скопје) и Филип Костадинов (Радовиш).
Најдобри асистенти по 11 кола се тројца ракометари на Струга – Филип Мечкароски има 36, Петар Ферукоски 26, додека Бобан Савески подели 24, исто колку и Мартин Серафимов од Автокоманда. Ферукоски има најмногу изгубени топки – 21, додека по 18 топки имаат загубено Славчо Шулески (Еурофарм Пелистер 2) и Божидар Илиески (Прилеп).
*покрај голманската статистика и параметрите за асистенциите, освоените топки и загубените топки не е целосен
Најдобри пеналџии по бројот на постигнати голови се Александар Стојков (Куманово) со 29, Наум Костов (Струга) со 26, Николас Боно (Вардар) со 23, како и Димитар Димитриоски и Денис Шабановиќ од Прилеп со 20, односно 19 успешно реализирани пенали. Според процентот на реализација најдобри се Мохамед Азиз од Еурофарм Пелистер 2 (10/11), Дамјан Митев (10/11) и Ненад Костоски од Струга (9/10).
Сезонава сменет е системот на натпреварување во Супер лигата, и сега е важен секој меч, секој бод, пред да продолжи разигрувањето за титулата. Наместо пренесување на бодови од меѓусебните дуели, или почнување со бодови и разлика од 1-2 бод меѓу најдобрите и оние што се пласирале во ТОП 6, сега се пренесуваат сите освоени бодови.
