Возбудувањата на 18. издание на Светското клупско првенство стартуваа со три натпревари во Каиро, а првиот ден помина во знакот на екипите од Египет и Обединетите Арапски Емирати.
Ал Ахли го запиша најубедливиот триумф, совладувајќи го Сиднеј Универзитет со огромни 41-14. Веќе по првото полувреме резултатот беше убедливи 20-6, со што победникот беше решен многу рано. Во оваа група е и унгарскиот шампион Веспрем, кој утре ќе се сретне со австралискиот тим.
Во групата А, Шарџа славеше против американскиот претставник Калифорнија Иглс со резултат 35-30. Тимот од ОАЕ утре е слободен, додека Американците ќе имаат уште потешка задача против моќниот Магдебург.
Замалек стартуваше со победа во групата Ц, совладувајќи го Таубате од Бразил во највозбудливиот меч на денот со 26-24. Утре на сцената стапува и Барселона, која ќе игра токму против бразилскиот состав.
