Албанија се свртува кон еден од најразвиените ракометни системи во Европа во обид да создаде подобри услови за развој на спортот. Албанската и Шпанската ракометна федерација потпишаа договор за соработка со кој ќе работат заеднички на повеќе сегменти – од теренот, преку едукацијата на кадри, до судењето и организацијата.

Договорот беше потпишан во Тирана, во седиштето на Олимпискиот комитет на Албанија, од претседателот на Албанската ракометна федерација, Лаерт Ќендро и првиот човек на шпанската федерација Франциско Беласкез Гарсија. На потпишувањето присуствуваа и генералниот секретар на Олимпискиот комитет на Албанија Герти Шима, како и албанскиот министер за спорт Бленди Гинџе.

Соработката нема да остане само на формален документ. Предвидени се конкретни технички програми и работа на терен, размена на методологија и знаење во администрацијата, како и заедничка работа во судискиот сектор.

Посебно е предвидена можност за размена на судии, но и организација на курсеви и семинари преку кои албанските кадри би можеле директно да учат од шпанскиот модел. Целта е постепено да се подобри квалитетот на работата на сите нивоа – од тренерите и играчите, до луѓето кои ги водат клубовите и натпреварувањата.

За Албанија ова е значаен чекор, особено ако се има предвид дека земјата во европски рамки сè уште е во процес на градење посериозна ракометна структура. Албанската федерација е полноправна членка на ИХФ од 1992 година, а актуелен претседател е Ќендро, додека генералниот секретар е Арманд Чакали.

Договорот со Албанија е дел од пошироката меѓународна стратегија на Шпанската ракометна федерација. Во последните години Шпанците развиваат вакви партнерства со повеќе федерации од Европа и од другите континенти. Меѓу земјите со кои веќе имаат воспоставено соработка се Романија, Полска, Словачка, Аргентина, Саудиска Арабија и Иран.

Во февруари годинава, на пример, Шпанија потпиша сличен договор со Романија. Таму соработката опфаќа и размена на тренери и судии, заеднички тренинг-кампови, пријателски натпревари и соработка околу организација на натпреварувања. Тоа покажува дека шпанската федерација сè повеќе го користи сопствениот систем на тренерска работа, развој на играчи и судии како основа за меѓународни партнерства.

Албанските медиуми договорот го гледаат како уште еден дел од поширокиот процес за развој на домашниот ракомет. Во последниот период федерацијата се обидува преку соработка со други национални федерации, но и преку односите со ЕХФ и ИХФ, да создаде подобра основа за идните генерации.

▶▶▶ Приклучи се на VIBER – https://abit.ly/viber-24rakomet
Добивај директно РАКОМЕТНИ ВЕСТИ на твојот мобилен телефон 📲.
Со еден клик до сите вести. 🤾

Ракометарките на Стружанка остварија победа на гостувањето кај Шампион со 21-19, иако во средината на вториот дел беа во негатива.

Стружанка водеше со 11-10 на паузата, но во второто полувреме домаќинките имаа во два наврати водство од два гола разлика.

Преку Трпкова, Шампион водеше со 16-15, но осум минути потоа не постигна гол, а гостинките тоа го казнија со четири гола во серија за 19-16.

На пет минути до крајот Шампион намали одново преку Трпкова на гол негатива, но Стружанка даде два гола во серија за триумф преку Маркоска и Трпеновска.

Најдобри стрелци во победничкиот тим беа Марија Маркоска и Бојана Билкова, додека Ева Трпкова даде шест за Шампион.

Во следното коло, Стружанка ќе игра градски двобој против Струга, додека Шампион ќе гостува кај Астибо.

Шестото коло во Лигата на шампионите кај дамите донесе убедливи победи на Есбјерг и Ференцварош, големо изненадување во Букурешт, како и драматични завршници во Љубљана и Оденсе.

Ференцварош останува единствениот тим со максимален учинок, додека норвешка Сола ја забележа втората победа во историјата на клубот во елитното натпреварување, а прва оваа сезона.

Лига на шампиони, 6 коло, резултати:

група А
Ференцварош – Борусија Дортмунд 39-25
Есбјерг – Брест Бретањ 35-26
Крим – Будуќност 24-23
ЧСМ Букурешт – Сола 22-30

група Б
Глорија Бистрица – Сторхамар 33-26
Мец – Бломберг 32-22
Оденсе – Ѓер 31-32
Подравка – Никобинг 33-26

Ференцварош ја продолжи победничката серија

Унгарскиот состав го скрши отпорот на Дортмунд во второто полувреме, во кое постигна 23 гола. Клучна беше серијата од 7-0, со која предноста од 20-16 порасна на 27-16. Ана Кристенсен имаше 18 одбрани, а Петра Симон и Катрин Клујбер постигнаа по осум гола. Ова беше 150 победа за унгарскиот состав во историјата на Лигата на шампионите.

Реистад со десет гола во дербито на колото

По израмнетото прво полувреме, данскиот тим направи клучна разлика по паузата и стигна до убедлива победа. Хени Реистад беше незапирлива со десет гола, додека Кјара Чиманга постигна пет за Брест. Францускиот тим го претрпе вториот последователен пораз во натпреварувањето.

Победа во последните секунди

Крим конечно ги освои првите бодови во сезоната по драматичен натпревар со Будуќност. При резултат 23-23, домашниот тим остана со играч помалку, а гостинките не реализираа седмерец. Казната стигна преку Нина Жулиќ, која погоди од контранапад за голема радост на словенечкиот состав. Жулиќ и Јована Скробиќ постигнаа по осум гола во двата тима.

Норвежанките приредија изненадување

Сола го шокираше ЧСМ во Романија и ја забележа втората победа во историјата на Лигата на шампионите. Гостинките имаа контрола во најголемиот дел од натпреварот, а во второто полувреме ја искористија слабата реализација на домаќинките и поведоа со пет гола разлика. Камила Херем и Пија Гронстад постигнаа по пет гола, додека Ема Фрис беше најефикасна кај ЧСМ со седум.

Бистрица во вториот дел го скрши Сторхамар

Романскиот состав славеше на домашен терен во натпревар во кој Сторхамар успеа да поведе во првото полувреме, но домаќинките ја презедоа контролата пред паузата. Клучна беше серијата од 8-2 во вториот дел, со која Бистрица се одлепи на 27-20. Данила Со Делгадо беше најдобра со десет гола, додека Анастасија Марсениќ постигна шест за Сторхамар.

Шампионките го решија мечот по паузата

Мец се намачи во првото полувреме против германскиот дебитант, кој успеа да се врати на 13-13. Сепак, домаќинките ја вратија предноста пред паузата, а во вториот дел ја засилија одбраната и му дозволија на противникот да постигне само осум гола. Лилу Борг постигна шест гола за Мец, додека Макси Милнер и Нурија Бухер имаа по седум за Бломберг.

Унгарскиот гигант се извлече во драматична завршница

Ѓер ја запиша 14 победа во 16 меѓусебен дуел со Оденсе, но мораше да се помачи до самиот крај. Домашниот тим се врати од негатива од три гола и израмни на 28-28, но гостинките беа посигурни во последните минути. Тјаша Станко постигна осум гола за Ѓер, исто колку и Роми Маршалкеверд за Оденсе.

Хрватскиот првак стигна до вториот триумф

Подравка одигра одлично на домашен терен и уште во првото полувреме создаде солидна предност против Никобинг. Данскиот тим имаше проблеми со реализацијата и ротацијата, а голманката Аница Гудељ забележа 11 одбрани. Матеа Шошо беше најефикасна кај победничкиот тим со седум гола, додека Клара Лерби постигна осум за Никобинг.

Покрај настапите на македонските претставници во ЕХФ Европскиот Куп, во фокусот се настапите и на македонските интернационалци.

Еден од нив, Томче Стојановски, во дресот на италијанскиот Сасари, се пласира во третата рунда, со двојна победа во „мак-двобојот“ со косовскиот Кастриоти предводен од екс македонскиот селектор, Владимир Глигоров. Евгениј Темелкоски со ПАОК запиша триумф со 38-19 над Борац Бања Лука што многу веројатно ќе биде доволен за третото коло.

Српска Војводина обезбеди пласман во третото коло, откако во двомечот со израелскиот Макаби Ришон Ле Зион славеше со вкупен резултат 67-64.
Макаби го доби првиот натпревар во Србија со 32-31, но Војводина возврати во реваншот. Српскиот тим направи серија од 6-1 кон крајот на првото полувреме, поведе со 21-16, а во 51. минута имаше и осум гола предност. На крајот, Војводина славеше со 36-32 и го потврди пласманот понатаму.

Црногорскиот Ловќен Цетиње убедливо го совлада Берхем од Луксембург со вкупни 74-64. Вук Мрвалјевиќ беше најефикасен стрелец во двомечот со 18 гола, а српска Дубочица беше подобра од летонскиот Добеле со вкупни 73-61.

Романска Турда славеше на гостувањето кај белгиски Спортинг Пелт со 29-27, во натпревар исполнет со пресврти. Иракли Кбилашвили и Раду Гица постигнаа по седум гола за победничкиот тим. Белгијците подобро го отворија мечот и во 12. минута водеа со 7-3, но Турда успеа да се врати и да поведе пред паузата. Во второто полувреме имаше неколку промени на водството, а романскиот состав беше посигурен во завршницата и обезбеди предност од два гола пред реваншот во Романија.

Грчка Драма славеше со минимални 31-30 против словачка Поважска Бистрица во првиот натпревар од двомечот. Домашниот тим имаше предност во поголемиот дел од првото полувреме, а највисоката разлика изнесуваше четири гола, 23-19. Словачкиот состав одговори со серија од шест последователни гола и првпат поведе во 45. минута со 25-23. Сепак, Драма успеа да ја врати предноста во завршницата и да стигне до минимален триумф пред реваншот.

Најголемата голеада во ова коло ја приредија украински Мотор и словенечки Словењ Градец, кои одиграа нерешено 41-41 во првиот натпревар. Мотор имаше подобар почеток и во 17. минута водеше со 15-9. Беше и 26-18, но словенечкиот состав не се предаде. Во вторите триесетина минути успеа да ја надомести негативата и да израмни на 39-39 две минути пред крајот. Двата тима постигнаа уште по два гола за конечни 41-41. Тјаж Шталекер со 12 гола и Велјко Станоевиќ со 11 беа најдобри кај гостите, додека Данило Рахозин и Виталиј Хоровиј постигнаа по девет гола за Мотор.

Победи што многу веројатно ќе им гарантираат мирен реванш остварија и турскиот Бешикташ, АЕК Атина, Олимпијакос, Остров Виекополски, Фади Винтертур, Тримо Требње, Рунар Сандефјорд…

ЕХФ Европски Куп, 2 коло, резултати:

БК46 – Мистра 28-22
АЕК Атина – Анортозис Фамагуста 37-21
Бешикташ – Фиверс Маргаретен 38-31
Дукла Прага – Нербо 33-28
Војводина – Макаби Ле Зион 31-32, 36-32
Берхем – Ловќен 30-40, 34-34
Драма – Повашка Бистрица 31-30
Горица – Бутел Скопје 27-24
Мотор Запорожје – Словењ Градец 41-41
Олимпијакос – Калиш 30-24
Остров Виекополски – Истанбул Генчлик 43-27
ХИФК – Фади Винтертур 32-42
Алкалоид – Ферлах 31-22
Х71 – Трогир 34-27
Тенакс Добеле – Дубочица Лесковац 32-41, 29-32
Тримо Требње – Динамо Панчево 39-27
Кастриоти – Сасари 28-37, 27-40
КРАС Волендам – Кремс 26-28
Спортинг Пелт – Потаиса Турда 27-29
Бурса Нилуфер – Рунар Сандефјорд 28-37
Берн – Касано 31-20
Бојнице – Вослауер 27-31
ПАОК – Борац Бања Лука 38-19