Ракометарите на Бутел Скопје загубија со 27-24 од хрватскиот состав Горица во првиот натпревар од второто коло во ЕХФ Европскиот Куп. Иако можеа да се вратат со подобар резултат, сепак во последните десетина минути домашните успеаја да го свртат резултатот во своја корист и по водството на Бутел со 23-21, направи голем пресврт, со серија од 6-1.

Стартот не беше ветувачки за скопскиот состав. По 2-2, Горица се одлепи на плус четири, 7-3, а во првите петнаесетина минути водеше и со пет гола, 11-6. Сепак бутелци навреме се разбудија.

Во финишот на полувреме ја стегнаа одбраната, по 13-10 за домашниот тим, четири минути гостинската одбрана не дозволи погодок, а за тоа време Марковски и Стаменковиќ погодија за минимална негатива на паузата, 13-12.

Вториот дел тргна со три гола на домашните за 16-12, а Горица остана без Дражен Огулиќ, кој доби директен црвен картон по опасниот старт над Тодески. Но момците на Стоилов возбратија на уште подобар начин.

Со серија од пет гола по ред и со одбрани на Чаневски, Бутел направи комплетен пресврт, 17-16, имаше и напад за плус два, кој не го реализира, па Горица казни со голови за 18-17.

Беше 18-18, но како одминуваше времето така Бутел ја преземаше контролата на теренот. На 20-20, Стоилов побара тајм-аут, а по интервенциите на Чаневски, Бутел за првпат водеше со два гола, 23-21, а имаше и напад за плус три со играч повеќе.

Сепак тој не беше реализиран и казната стигна на спротивната страна, па Горица успеа да израмни 23-23. Двете екипи во продолжение промашија по два пати, а домашните преку Пит ја вратија предноста на своја страна.

Капитенот Ѓоргиевски беше исклучен, тоа го искористи Горица и на две минути до крај отиде на плус два, 25-23, па Стоилов мораше да бара тајм-аут. Костов ја прекина „црната серија“ на Бутел и намали на 25-24.

Дујиќ одново ја однесе Горица на плус два, 26-24, бутелци погрешија и останаа уште дваесетина секунди за хрватскиот состав за напад. Успеаја да организираат напад и на крајот прославија триумф со три гола, 27-24. Во составот на Бутел по четири пати погодија Николоски, Субашевски и Стаменковиќ, а кај домашните се истакна Цековиќ со пет погодоци. На голот на Бутел одличен беше Чаневски.

Реваншот ќе се одигра во Скопје на 24 октомври од 17:00 часот.

Македонскиот чувар на мрежата Андреј Петковски ја продолжи одличната форма во чешкиот шампионат.

Иако неговиот тим Плзен загуби на гостувањето кај Брно со 35-31, Петковски одново беше на ниво и меѓу најдобрите поединци.

Тој успеа да запре 11 удари на противничките ракометари, но немаше голема поддршка од соиграчите, па Плзен го запиша првиот сезонски пораз.

Сега тимот на Петковски е втор на табелата со 11 бода, зад Карвина која има 12, а во следното коло ќе има лесна задача на домашен терен против составот на Копривнице.

• По се поизвесното заминување на Јоханес Гола од Мелсунген, бундеслигашот веќе пикира замена за германскиот репрезентативец. Според „Билд“, пивотот на Нант, Николас Турна следното лето би можел да заигра во дресот на Мелсунген.
• Чешкиот репрезентативец Станислав Кашпарек замина од катарскиот Ал Араби и во иднина ќе го носи дресот на големиот ривал Ал Духаил. Десниот бек претходно играше за Балантонфуреди, ПИК Сегед, Мешков Брест, Динамо Букурешт…
• Рускиот шампион ЦСКА Москва ангажираше засилување од Балканот по долго време. Црногорскиот пивот Михајло Шчекиќ, по двојната круна минатата сезона со Ловќен, се пресели во Москва, каде ќе остане најмалку една сезона.
• Норвешкиот репрезентативец Симен Лисе, кој дојде во ПСЖ минатата сезона и потпиша до 2029 година, идното лето се враќа во Скандинавија. Незадоволен од минутажата, Лисе ќе се пресели во данската Фредериција.