По поразот во Кавадарци од Тиквеш, тимот на Охрид им се врати на победите во суперлигашкото друштво, откако во СРЦ „Билјанини Извори“ го совлада новакот во елитата Аеродром со 31-23.
Охриѓани уште од стартот си го фатија редот, направија солидна предност, во вториот дел само ја одржуваа и зголемија, додека момците на Дарко Петровски немаа сили за уште едно изненадување по она во Битола.
Избраниците на Стевче Алушовски отворија со водство од 4-1, но аеродромци успеаја да се вратат на минус еден, 7-6. Тогаш како да застанаа гостинските ракометари и Охрид успеа со серија од пет гола да ја направи клучната разлика, 12-6.
Десното крило Стоилевски погодуваше најмногу во овој период, а по подолго време на терен се најде и Каракоч, кој стави точка на првиот дел со голот за плус седум на паузата, 18-11.
На стартот на вториот дел Костов и Митревски намалија на 18-14, но пак следуваше „црна дупка“ во играта на Аеродром и Охрид создаде комотна предност, 24-16. Гостите не се откажуваа и се бореа, но немаа сили да парираат на расположениот домаќин.
Најдобри стрелци во победничкиот тим беа Орјоникидзе и Стоилевски со по шест реализации, додека кај Аеродром, Наум Костов даде осум гола. Во следното коло Охрид ќе игра со Скопје, додека Аеродром со Струга.
