Ракометниот клуб Охрид наскоро ќе го добие назад едно од своите најзначајни засилувања – грузискиот бек Теимураз „Темo“ Орјоникидзе. Играчот е дел од бековската линија на клубот, но лани се повреди настапувајќи за репрезентацијата на Грузја, и мораше да оди на операција. Веќе е во завршна фаза од рехабилитацијата и според информациите од клубот, на терен се очекува да се врати во февруари.
Орјоникидзе веднаш по доаѓањето остави силен впечаток. Се истакна со агресивна игра, продорност, енергија и брзи решенија. Сезонава клубот донесе неколку засилувања и нов тренер, Борис Ројевиќ, а Орјоникидзе немаше шанса заедно да тренира со новите соиграчи.
По дербито Охрид – Вардар во саботата, го сретнавме Темо во салата „Билјанини Извори“. Видно расположен, но и мотивиран повеќе од кога било, ни потврди дека закрепнувањето се одвива одлично.
„Со нетрпение чекам да се вратам на терен. Работам секој ден, се чувствувам подобро и верувам дека во февруари ќе бидам подготвен да му помогнам на тимот“, ни изјави Орјоникидзе.
Охрид напролет го очекуваат најважните натпревари сезонава – двомечот од ЕХФ Европскиот Куп против чешкиот состав Дукла Прага. Враќањето на Темо токму пред европските предизвици ќе биде огромно засилување за тимот на Ројевиќ, кој ќе добие дополнителна моќ во нападот и стабилност во бековската линија.
Со Темо назад на терен, Охрид ќе влезе во пролетниот дел многу покомплетен, поопасен и со поголеми амбиции на сите фронтови.
