Европската ракометна федерација ги делегираше официјалните лица за натпреварите од квалификациите за ЕП 2026. Женската репрезентација на Македонија е дел од квалификациската група 3 и за пласман на ЕП ќе се бори со Германија, Словенија и Белгија.
Првиот натпревар Македонија ќе го игра на гостински терен кај Германија во Гумерсбах во „Швалбе Арена“ со почеток од 19:30 часот на 16 октомври.
Овој дуел им е доверен на данските судии Никлас Нигард и Јонас Примдал, додека делегат ќе биде Мери Лин Агиус.
Втората средба на Македонија е закажана за 19 октомври од 18:00 часот во спортската сала „Боро Чурлевски“ во Битола.
Важниот натпревар за нашата селекција ќе го судат Црногорките Јелена Вујачиќ и Анѓелина Казанегра, а делегат е Владимир Јовиќ од Босна и Херцеговина.
Пласман на ЕП 2026 во Полска, Романија, Турција, Словачка и Чешка, ќе обезбедат прво и вторпласираните селекции од шесте групи, како и најдобрите четири третопласирани од шест групи.
