Тимот на Бутел Скопје очекува враќање на победничките патеки во Супер лигата по поразот кај Прилеп.
Нов предизвик за бутелци ќе биде домашниот натпревар со тимот на Куманово, кој доаѓа в сабота во „Антон Димитров“ од 18:00 часот.
Кадетскиот репрезентативец Петар Николоски очекува добрата одбрана да го реши победникот.
„Екипата на Куманово не смееме да ја потцениме, таа е достоен противник. Но ние напорно се спремаме и тренираме, ќе дадеме се од себе, со добра одбрана и помал број на грешки во нападот да дојдеме до сигурна реализација, а со тоа и враќање на победничката патека. Ривалот го познаваме од играта во досегашните натпревари, тие се добра екипа и според мене најголемата опасност доаѓа од бековите. Но со стабилна и фер игра треба да дојдеме до заслужена победа“, изјави Николоски.
Бутел Скопје секогаш во клупската историја во елитното друштво обезбедувал место во плеј-офот, а Николоски посакува тоа да биде случај и оваа сезона.
„Прво би сакал да се заблагодарам на моите тренери и моите соиграчи, за целосната доверба и поддршка што ми ја даваат. Како млад играч на Бутел Скопје, посветено работам и тренирам, со цел да напредувам и допринесам во реализација на нашата цел. Мојата лична амбиција е иста со таа на мојот тим – целта е една и заедничка, пласман во плеј-оф и што подобро место на табелата“, заврши Николоски.
Натпреварот меѓу Бутел Скопје и Куманово се игра в сабота во салата „Антон Димитров“ со почеток во 18:00 часот.
